By Frances Pio
––
Umabot na ang mga aktibong kaso ng COVID-19 sa 10,094 noong Lunes matapos mag-ulat ang Department of Health (DOH) ng karagdagang 1,188 na kaso ng COVID-19 sa pamamagitan ng coronavirus tracker nito.
Inangat ng mga bagong impeksyon ang kabuuang kaso ng COVID-19 na naitala sa bansa sa 3,709,386, kabilang ang 3,638,690 nakarekober at 60,602 na namatay.
Ang mga bagong kaso ng coronavirus noong Lunes ay mas mataas kaysa sa average na daily infections na naitala noong nakaraang linggo (Hunyo 27 hanggang Hulyo 3), na nasa 1,057, bagama’t mas mababa sa naitala na 1,323 bagong kaso noong Linggo, Hulyo 3.
Lumabas din sa datos ng DOH na ang Metro Manila ay patuloy na nagrerehistro ng pinakamataas na bilang ng mga bagong impeksyon sa mga rehiyon ng bansa sa nakalipas na dalawang linggo na may 5,783 kaso. Kasunod nito ang Calabarzon na may 2,263 kaso at ang Western Visayas na may 1,014.