By Jim Lloyd Dongiapon
––
Usa ka kanhi Kapitan sa Barangay Dalican Poblacion ug napilding kandidato pagka-mayor sa Datu Odin Sinsuat, Maguindanao (karon kabahin na sa Maguindanao del Norte) sa milabay nga May 9, 2022 elections, ang gipusil-patay Biyernes sa hapon, Setyembre 30.
Giila ang biktima nga si Datu Jamael “Jam” Sinsuat, uyoan ni Datu Lester Sinsuat, kasamtangang alkalde sa Datu Odin Sinsuat
Sumala sa inisyal nga imbestigasyon, nahitabo ang insidente sa pagpamusil human sa Friday congregational prayer (Jumu’ah) sa usa ka masjid sa Barangay Dalican Poblacion, tupad lang sa munisipyo.
Mobiyaay na unta si Datu Jamael sa masjid sa dihang gipusil siya sa makadaghang higayon sa mga wa pa mailhing mga mamumuno.
Dali siyang gidala sa duol nga balay tambalanan, apan gideklara siyang dead on arrival.
Patay usab sa nasangpit nga insidente ang usa sa iyang mga close-in escort tungod sa mga makamatay nga mga pinusilan sa ulo, samtang grabehang nangaangol ang tulo pa ka kaubanan niini.
Nagapahigayon na og malawmong imbestigasyon angDatu Odin Sinsuat Municipal Police Station ug ang Scene of the Crime Operatives aron matino ang mga motibo ug ang mga sad-an.
Sa laing bahin, nagpagula si Mayor Sinsuat og pamahayag nga nagkondenar sa pagpatay sa iyang uyoan pinaagi sa opisyal nga Facebook page sa ilang lokal nga panggamhanan.
“Inna lillahi Wa Inna Ilayhi Rajiun (Sa pagkatinuod kita iya ni Allah ug sa pagkatinuod ngadto Kaniya kita mobalik). I, my family, together with all the constituents of the Municipality of Datu Odin Sinsuat, Maguindanao, strongly condemn in the highest form the brutal killing of my uncle, Datu Jamael Q. Sinsuat, in broad daylight right after the Friday Jumuah Prayer, which happened today, September 30, 2022 (Ako, akong pamilya, uban ang mga konstituwente sa Munisipalidad sa Datu Odin Sinsuat, Maguindanao, kusganong nagkondena sa pinakataas nga hulag ang brutal nga pagpatay sa akong uyoan Datu Jamael Q. Sinsuat, sa hayag nga adlaw human sa Friday Jumuah Prayer, nga nahitabo karong adlawa, Setyembre 30, 2022) ” segun sa pahayag.
“This cruel and cowardly act should hold no place in our society and community. As such, we are calling on the authorities to immediately conduct an extensive investigation into this matter to make the perpetrators answerable for this dastardly deed (Kining bangis ug matalaw nga buhat kinahanglang wala’y dapit sa atong katilingban ug komunidad. Tungod niini, nanawagan kami sa mga awtoridad nga himoon dayon ang usa ka halapad nga imbestigasyon bahin niining butang aron mapatubag ang mga sad-an niining daotang binuhatan),” dugang niini.
Nipadayag usab ang alkalde sa iyang pahasubo ngadto sa nagbangutang pamilya ug higala sa iyang uyoan, ug miingon siya nga siya nagaampo uban kanila alang sa hustisya.
Gipasalig usab niya sa iyang mga konsituwente “nga ang Philippine National Police, Armed Forces of the Philippines, ug uban pang law enforcement agencies ang nagapabilin sa kalinaw ug kahusay sa Munisipalidad.”
Mipaabot na usab si Cotabato City Mayor Mohammad Ali “Bruce” Matabalao sa iyang pahasubo ngadto sa pamilya sa iyang ig-agaw sa balaod.