Share:

By: Jim Lloyd Dongiapon

Nalugwayan pa ang taas nang panahon sa pagpangita sa hustisya sa pamilyang Mangacop human gi-oktaba pa og usab ang pagtaral kang Dr. Marvin Rey Andrew Pepino, ang suspek sa pagpatay sa 19-anyos nga Grade 9 student nga si Amierkhan Mangacop niadtong Hulyo 2, tungod sa pag-atras sa huwes sa paghupot sa kaso. 

Nagpagula karong adlawa og court order si Regional Trial Court (RTC) 11 Branch 17 Presiding Judge Marie Estrellita Tolentino, ang huwes nga gidestino alang sa pagdungog sa kasong homicide nga giduso batok kang Pepino, nag nag-ingon nga siya boluntaryong ni-inhibit sa pagdumala sa mga pagdungog.

Segun ni Tolentino, gibuhat niya kini “aron malikayan ang bisan unsa mang paglantaw sa bayas o pagpihig” sa iyang bahin sanglit ang abogado nga nagrepresentar sa akusado gikan sa law firm nga gitukod sa iyang amahan.

A review of the records shows that during the proceedings before the City Prosecution’s Office, (the) accused was represented by Atty. Adam Dandro Jambagan of the Tolentino Law Office, the Law office founded by the undersigned’s father,” matud sa orden.

(Nakita sa pagripaso sa mga rekord atol sa mga pagdungog ngadto sa City Prosecution’s Office nga ang akusado girepresentar ni Atty. Adam Dandro Jambagan gikan sa Tolentino Law Office, ang Law office nga gitukod sa amahan sa mipirma niini.)

Gihimo niyang basehan sa iyang desisyon ang Section 1, paragraph 2 of Rule 137 of the Rules of Court as the basis of her decision, nga nag-ingon, “A judge may, in the exercise of his sound discretion, disqualify himself from sitting in a case, for just or valid reasons other than those mentioned above.” 

(Ang usa ka huwes mamahimo nga, sa paggamit sa iyang maayong paghukom, idiskwalipikar ang iyang kaugalingon sa paglingkod sa usa ka kaso, tungod sa makatarunganon ug balidong mga rason gawas sa mga una nang nahisgotan)

Tungod niini, i-raflle og balik ang kaso ngadto sa uban pang mga dibisyon sa korte.

Wala pa nagpagawas og pamahayag kalabot niini si Atty. Gibb Andrew Cabahug, ang abogado sa pamilyang Mangacop.

Kahinumduman nga niadtong Hulyo 22, gibutyag ni Cabahug nga nagduso ilang kampo og motion for reconsideration aron balihon ang pagpaubos sa kaso ni Pepino gikan murder ngadto sa homicide.

Upat ka adlaw ang milabay, niadtong Hulyo 26, nagpagula og orden si RTC XI Branch 17 Acting Presiding Judge Emmanuel C. Carpio nga nagsuspinde sa pagdungog sa kaso sulod sa 60 ka adlaw, samtang ginapaabot pa ang resolusyon sa motion for reconsideration nga giduso sa  Private Prosecutor ug sa oposisyon nga giduso sa abogado sa akusado.

Leave a Reply