By Jim Lloyd Dongiapon
––
Patay ang usa ka sakop sa Philippine National Police-Special Action Force (PNP-SAF) human aksidenteng mapusilan ang kaugalingon samtanga anaa sulod sa iyang bunkhouse sa compound sa Police Regional Office (PRO) 12 Headquarters sa Barangay Tambler, General Santos City, alas 3:36 kagahapon sa hapon, Agosto 3.
Giila ang biktima nga si Police Corporal (PCpl.) John Paul Dayang Alintana, edad 29, usa ka miyembro sa PNP-SAF nga nakabase sa PRO-12, ug lumulupyo sa Purok 3A, Barangay Tinaungan, Pres. Quirino, Sultan, Kudarat.
Subay sa pasiunang imbestigasyon sa General Santos City Police Office (GSCPO), samtang ginalimpyohan ni Alintana ang iyang service weapon, nga usa ka 9mm Taurus pistol nga dunay serial number TMR07483, wala niya tuyoa nga mabira ang gatilyo niini, ug napusilan siya sa iyang nawong.
Sa dihang gisusi sa iyang mga kaubanan ang ilang barracks human makadungog og buto sa pusil, nakaplagan nila ang biktima nga naligo na sa kaugalingon niining dugo.
Gidala pa siya sa Gensan Medical Center apan gideklara kining dead on arrival sa attending physician.
Nakuha gikan sa gipanghitabuan sa insidente ang iyang service firearm, magazine nga duna pa’y 14 ka buhing bala, ug usa ka fired cartridge.
Gimando na ni PRO-12 Director Police Brigadier General (PBGen) Alexander Tagum ang malawmong imbestigasyon sa maong insidente.
Mihangyo usab si PBGen. Tagum sa mga kabanay ni Alintana nga hatagan og igong panahon ang GSCPO aron makompleto ang ilang imbestigasyon.
Ipailalom sa paraffin test ang minatay sa biktima samtang ang nakuhang ebidensya ipailalom usab sa ballistic examination sa Crime Laboratory Office 12.