By: Jim Lloyd Dongiapon
Gikumpirma sa Davao City Police Office (DCPO) Lunes, Setyembre 19, nga duha ka magtutungha sa kolehiyo ang nahimong biktima sa bayolente nga insidente sa hazing nga nahitabo niadtong Dominggo, Setyembre 18, sa Barangay Mandug, Davao City.
Gipamahayag ni DCPO Spokesperson Police Major (PMaj.) Maria Teresita Gaspan nga ang mga biktima mga neophyte nga estudyante sa criminology. Usa kanila, edad 19, nakabsan sa kinabuhi tungod wa na niini nakaya ang iyang mga samad, samtang ang lain pa nga 18-anyos nga estudyante ang nakaluwas apan nakahiagum og seryosong mga samad sa kalawasan.
Alas 4:30 karong hapon, nagpagawas og pamahayag ang University of Mindanao (UM) kalabot sa giingong kalambigitan sa mga 4th year nga estudyante gikan sa College of Criminal Justice Education (CCJE), nga gikatahong mga miyembro sa AKRHO Alpha Delta Chapter fraternity, sa insidente sa hazing.
Matud sa UM, ilang “kusganong ginakondena ang wala’y pulos ug masulub-ong insidente sa pinakalabaw nga kabalaka ug kadismaya, samtang ang unibersidad nagahanyag og hingpit nga kasub-anan ngadto sa mga pamilya sa mga biktima.”
Dugang sa unibersidad nga ilang gibawal na ang mga praternidad sukad nga nahimong balaod ang Republic Act No. 8049, ug ang mga samang organisasyon ug mga buhat sama sa hazing nakasupak sa ila nang naestablisar nga core values.
Giklaro usab sa UM nga ang “AKRHO Alpha Delta fraternity usa ka wala ginailang organisasyon sa unibersidad, lakip ang tanan nilang iligal nga aktibidad ug talaan sa ilang mga miyembro.”
“Nahitabo sab ang insidente sa hazing gawas sa campus premises sa unibersidad; gituyo ug tago kini nga gibuhat sa hilit nga barangay sa Upper Mandug, Buhangin, Davao City. Apan, kay sila mga magtutungha sa unibersidad, nagdala sila og kadaut sa ngalan sa institusyon. Ang mga sad-an wa nagtahod sa istriktong mga panudlo sa presidente batok sa hazing sulod man o gawas sa unibersidad,” dugang sa UM.
Naghanyag na ang UM sa ilang kinasingkasing nga pahasubo ngadto sa mga pamilya sa mga biktima ug nagpasalig nga sila maghatag kanila og hinabang.
“Hinaot nga kini na insidente magsilbi isip seryoso nga pasidaan sa tanang mga hingtungdan,” pagtapos sa unibersidad sa ilang pamahayag.
Sa pikas bahin, anaa na sa kustodiya sa Mandug Police Station ang walo ka mga estudyante nga gituohang dunay kalambigitan sa insidente sa hazing.