Jim Lloyd Dongiapon
––
Padayon pang ginaimbestigahan sa istasyon sa kapulisan sa Manay, Davao Oriental ang insidente sa pagpamusil nga mipatay sa usa ka indibidwal sa national highway mismo sa Purko 10, Barangay Central alas 10:45 sa buntag karong adlawa.
Giila ang biktima nga si Danilo Lumikid, o mas naila isip Donnie, ulitawo, ug residente sa nasangpit nga barangay. Usa sab kini ka vlogger ug kritiko sa usa ka politiko sa iyang probinsya.
Sumala ni Manay Municipal Police Station Chief PMaj. Meliton Sango, hilom ang dapit nga gipanghitabuan sa krimen. Nagabiyahe ang biktima padulong sa dili pa matinong lugar, ug posible kining gipatay sa usa ka riding-in-tandem. Ginasuta na usab nila ang Barangay Central ug ang mga palibot niini aron masayran kung asa na ang mga gituohang suspek.
Wala pa usab ginasalikway sa kapulisan ang posibilidad nga kini usa ka election-related nga krimen.
Ayha pa man nakabsan og kinabuhi si Lumikid, nag-post pa kini og lip sync video sa iyang Facebook ug Tiktok accounts nga duna’y caption nga: “Hindi LAHAT ng maka Dyos, Maka Tao. . ! (Dili tanang dinyos, tawhanon).”
Kanunay nga hisgutanan sa mga video ni Lumikid mao ang pagpanaway sa daw dili pagtagad sa usa ka politiko sa mga mulo sa mga tawo ug ang kawad-on sa kalamboan sa ilang lungsod.
Ang mga higala ug mga viewer ni Lumikid ang nahasubo tungod sa hinanali niyang kamatayon. Gipunto usab sa uban nga manglisod ang Manay nga makakita og pag-uswag sanglit siya ang nakita nilang pwersa sa paglaum og kabag-uhan sa ilang lungson.
Nag-post usab ang iyang higala nga si Reynaldo Pom Montero sa Facebook aron mubungat og hustisya alang kay Lumikid.
“Pahulay na sa kalinaw, akong kaanib! Nanawagan kami og hustisya alang kay Danilo Lumikid!” gisulat ni Montero sa pinulungang Ingles.