By: Jim Lloyd Dongiapon
Nagpagula ang City Government of Cagayan de Oro og sertipikasyon Biyernes, Disyembre 9, nga nagdeklara sa 34 sa 80 niini ka barangay nga luwas na sa African Swine Fever (ASF).
Gihimo ang maong deklarasyon human nga ang maong mga barangay mituman sa Exit from Quarantine Protocol ug sa mga mando nga nahisulat sa Department of Agriculture (DA) Administrative Order No. 7, Series of 2021, kon “Implementing Guidelines of Bantay ASF sa Barangay Program.”
Kini nga mga ASF-free barangay mao ang: Agusan, Baikingon, Balulang, Bayabas, Bonbon, Brgy. 21, Brgy. 22, Brgy. 23, Bulua, Camaman-an, Canitoan, Carmen, Cugman, FS Catanico, Gusa, Indahag, Iponan, Kauswagan, Lapasan, Lumbia, Macabalan, Macasandig, Mambuaya, Pagalungan, Pagatpat, Patag, Puerto, Puntod, San Simon, Tablon, Taglimao, Tagpangi, Tuburan,ug Tumpagon.
Ang mga sample nga nakolekta gikan sa mga sentinel nga baboy ang nagnegatibo sa RT-PCR ASF test nga gihimo sa Regional Animal Disease Diagnostic Laboratory X.
Tungod niini, giklasipika na ang tibuok Cagayan de Oro City nga usa ka ASF “Pink Zone.”
Ang Pink Zones mao ang mga dapit nga wala’y gikatalang mga kaso sa ASF, apan dunay mga silingang Red Zones. Kini nga klasipikasyon gitinguha aron mapugngan ang pagkaylap sa mga kaso gikan sa mga ASF-infected pinaagi sa pinaagi sa mga lakang nga magpakunhod niini sama na lang sa biosecurity ug pagpaniid.
Gitugot usab sa maong status ang lokalidad nga makabaligya na sa ilang mga baboy. Apan, ang mga baboy, karne niini ug uban pang mga produktong gama sa karneng baboy nga gikan sa mga ASF “Green” ug “Dark Green” zones, o kadtong mga dapit nga luwas na gikan sa maong kagaw, ang gitugotan nga makasulod sa dakbayan.
Nagahinaot usab ang City Veterinary Office sa CDO nga matapos na sa umaabot nga tuig ang mga outbreak sa ASF, nga padayong nakaapekto sa industriya sa baboy sukad pa niadtong tuig 2019.
Kahinumduman nga niadtong Nobyembre karong tuiga, temporaryong gibawal ang pagpasulod sa mga baboy, karne sa baboy, ug sa mga produktong gama gikan sa karneng baboy, nga nanukad sa silingang Zamboanga Peninsula tungod sa klasipikasyon sa rehiyon nga “Red Zone,” o usa ka dapit nga dunay kumpirmadong kaso sa ASF.