By Jim Lloyd Dongiapon
Samdan si Datu Ohto Caumbo Montawal, alkalde sa lungsod sa Datu Montawal, Maguindanao del Sur, sa usa ka pagpamanhig nga nahitabo Miyerkules sa gabii, Pebrero 22, sa Roxas Boulevard Service Road sa Pasay City.
Sayo nianang adlawa, mitambong si Mayor Montawal sa 2023 General Assembly of the League of Municipalities of the Philippines, nga gipahigayon sa Manila Hotel sa Dakbayan sa Maynila.
Nakakuha og impormasyon ang Pasay City Police Station 1 gikan sa saksi nga si Ronald Bacor Caumbo (43 anyos), mahitungod sa insidente.
Gikataho ni Caumbo ngadto sa mga pulis nga samtang sila nagaagi sa Roxas Boulevard Service Road, duha ka wala mailhang suspek ang miduol sa ilang van, ug ang usa kanila mihulbot sa iyang armas, ug gipusil ang ilang sakyanan.
Daling misibat ang mga mamumuno gikan sa gipanghitaboan sa krimen, ngadto sa direksyon sa Gil Puyat (Buendia) Avenue.
Bisan wala naangol si Caumbo, si Mayor Montawal nakahiagom og samad pinusilan sa iyang bat-ang ug wala nga bukton, ug dali siyang gidala sa Ospital ng Maynila Medical Center sa Malate, Maynila.
Gibalhin siya sa Asian Hospital and Medical Center sa Alabang, Dakbayan sa Muntinlupa, diin kasamtangan siyang nagpaalim sa iyang mga nahiagumang samad.
Human sa ocular examination sa gipanghitaboan sa krimen, nakakuha ang Pasay City Police Station 1 og duha ka basyo sa bala.
Nakakuha sab sila og CCTV gikan sa maong dapit, ug ginasusi na kini karon isip kabahin sa ilang imbestigasyon.
Wala pa nahibal-an sa karon ang motibasyon sa krimen, kung may kalabutan ba kini sa politika o sa personal nga pagdumot.
Nahitabo ang pagpamanhig kang Montawal human ang susamang insidente nga gikalambigitan sa gobernador sa Lanao del Sur, si Mamintal “Bombit” Alonto Adiong Jr., kinsa gibanhig didto sa Bukidnon. Bisan pa man naluwas siya, napatay ang iyang upat sa iyang security escorts ug ang iyang tigmaneho.
