By Jim Lloyd Dongiapon
Nasunog ang usa ka cargo ship sa kadagatan sa Zone 2, Barangay Cugman, dakbayan sa Cagayan de Oro, pasado alas 12:00 sa hapon Martes, Pebrero 2.
Sumalaa pasiunang impormasyon, ang maong barko gipanag-iya sa Quality Agri Supply ug gikan pa kini sa Butuan City, Agusan del Norte.
Sa wala pa nagkalayo ang barko, bag-o lang kini natapos og diskargar sa mga balas ug graba nga dala niini sa maong lugar.
Mitaho sab ang mga tripulante nga depektoso na ang makina sa ilang barko ug ayohonon na unta kini.
Dugang nila, miingon sila nga samtang nag-welding sila sulod sa barko, kalit na lang nga miaso ang makina ug dayon nasunog na kini.
Gisulayan sab nila og palong ang kalayo pinaagi sa pagsabwag og tubig, apan midako ang kalayo, hinungdan nga miambak sila sa dagat.
Gilayong miresponded ang Philippine Coast Guard aron palungon ang kalayo ug iluwas ang mga tripulante sa barko.
Nasayran sab kinadugayan nga wala ang kapitan sa barko tungod mitambong kini sa pagsaulog sa adlawng natawhan sa iyang kabanay niadtong tungora.
Dili usab klaro sa karon kung duna siya’y tulubagon sa insidente.
Samtang, nagapadayon pa ang imbestigasyon sa pagsulat niining balita.