By Jim Lloyd Dongiapon
––
Nagpagula og usa ka media release ang Coca-Cola Beverages Philippines, Inc. (CCBPI), nga nagakumpirma nga ang kasamtangang kakulangon sa bottler’s grade o premium refined sugar, nga ginagamit sa paggama og soft drinks, ang nakaapekto sa produksyon sa pipila sa ilang planta sa nasud.
“CCBPI confirms that the supply shortage of Bottler’s Grade sugar has affected the capability of some of our bottling plants to continue producing some products (Ginakumpirma sa CCBPI nga ang kakulang sa suplay sa Bottler’s Grade sugar ang nakaapekto sa kapabilidad sa pipila sa among bottling plants nga makagama og pipila ka mga produkto),” segun sa kompanya sa ilang pamahayag.
Hinuon, wala nila gibutyag kung hain sa ilang mga planta ang temporaryong mihunong sa ilang operasyon.
Kahinumduman nga sayo ning semanaha, nagbutang og tarpaulin ang ilang production plant sa Ulas, Davao City nga nagaanunsyo sa temporaryong pag-undang sa ilang operasyon gumikan sa kakulangon sa bottler’s grade sugar dala sa nagapadayong krisis sa asukal sa nasud. Gani, nahimo pang trending topic sa social media ang mga hulagway niini.
Apan, wala pa’y usa ka adlaw human nila gihimo ang anunsyo, mibalik na sa regular na operasyon ang Ulas plant, ug gitanggal na usab ang tarpaulin nga gibutang nila sa ilang propedad.
Samtang, mipasalig ang CCBPI sa ilang mga customer sa ilang miaging media release nga sila “kasamtangang nagapatuman na og lainlaing mga pagpaningkamot nga gitumong sa paghupay sa epekto sa kakulang sa suplay sa premium refined sugar ngadto sa mga negosyo.”
“We are also continuing to work with the government and the broader sugar industry sector to arrive at a sustainable solution for the benefit of the small retailers who also rely on [the] product’s availability for their livelihood,(Nagapadayon usap kami sa pagtrabaho kuyog ang gobyerno ug ang mas lapad nga industriya sa asukal aron makaabot sa usa ka malungtarong solusyon alang sa kaayuhan sa gagmayng mga retailer nga nagsalig usab sa pagkaanaa sa produkto alang sa ilang panginabuhian)” dugang nila.
Gipadayag sab sa CCBPI ngadto sa ilang pakigtagbo kang Presidente Ferdinand “Bongbong” Marcos, Jr. nga ang soft drink industry nanginahanglan og dili mominus sa 450,000 metriko tonelada (MT) sa premium refined sugar aron matubag ang panginahanglanon sa mga customer ug aron makapadagan na sila sa ilang puno nga kapasidad alang sa nahibiling bahin sa kasamtangang tuig.
Kini, matud pa sa kompanya, taliwala pa sa 400,000 MT nga kakulangon sa premium refined sugar gawas pa sa 200,000 starting gap sa local supply sa tuig 2022, subay sa projected demand nga 2.3 milyon ka metriko tonelada sa asukal sa tibuok nasud sa alang sa kasamtangang tuig.