By Jim Lloyd Dongiapon
Human sa serye sa mga pangpublikong konsultasyon ug deliberasyon sa komite, ang Bangsamoro Transition Authority (BTA) Parliament Bill No. 29, kon Bangsamoro Electoral Code, haduol na sa pag-apruba sa komite.
Bag-ohay lamang nga natapos sa BTA Parliament Committee on Rules ang paghisgot sa 14 ka mga artikulo nga naglangkob sa electoral code naidtong milabayng semana.
Niadtong Miyerkules, Pebrero 8, gipangulohan ni Floor Leader ug Committee on Rules Chair Atty. Sha Elijah Dumama-Alba, MP, ang deliberasyon sa Articles 7 hangtod 10, nga nagtakda sa mga kinahanglanon alang sa mga elective local official, ang asod-asod sa piniliay alang sa mga opisyal, ang pagpahigayon sa eleksyon, mga elektorada, ug ang pagdumala sa eleksyon.
Segun ni Dumama-Alba, plano sa iyang komite nga itunol ang report niini sa pagsugod sa sesyon sa parliyamento sunod semana.
Kalabot niini, giumoll sa Commission on Elections (COMELEC) ang “Bangsamoro Study Group,” nga gilangkuban sa mga abogado ug mga opisyal gikan sa ahensya, aron susihon ang gisugyot nga Bangsamoro Electoral Code.
Gibutyag ni Atty.George Garcia, ang labaw sa COMELEC, sa iyang pakighinabi sa usa ka lokal nga istasyon sa radyo nga ila nang gitugyan ngadto sa Committee on Rules ang ilang 265 ka pahina nga komento mahitungod sa electoral code aron ila kining matuki.
Dugang ni Garcia nga nagpaabot sila sa tubag sa BTA Parliament mahitungod sa ilang komento.
Ang electoral code mao’y usa sa mga prayoridad nga balaod nga kinahanglang ipalabang sa Bangsamoro Parliament sa dili pa ang Hunyo 30, 2025, o sa panahon sa transisyon, subay sa gimando sa Organic Law for the Bangsamoro Autonomous Region (Republic Act No. 11054).
Maglatid kini sa structural, operational, ug procedural rules nga magdumala sa pagpili sa mga opisyal sa rehiyon.