Jim Lloyd Dongiapon
–
Makusganong gikondena nila Mati City Mayor Michelle Rabat ug Davao Oriental Governor Nelson Dayanghirang ang pagpatay kang Barangay Matiao Captain Ronnie Valera, kinsa gipusil sa wala pa matinong mamumusil sulod mismo sa iyang pinuy-anan samtang nagapahulay sa iyang duyan pasado alas 8:18 sa gabii niadtong Miyerkules Santo, Abril 13.
Sa iyang mubong Facebook post, mihanyag si Rabat sa iyang simpatiya og pahasubo ngadto sa pamilya ni Valera ug misaad nga mahatag kanila ang hustisya.
Samtang, sa iyahang opisyal nga pamahayag, gihulagway ni Dayanghirang ang kamatayon ni Valera isip dakong kawad-on sanglit mahinungdanon ang iyang gitampo alang sa kalamboan sa Dakbayan sa Mati ug sa probinsya sa Davao Oriental.
Nanawagan usab siya sa mga awtoridad nga magpahigayon og hingpit nga imbestigasyon aron mahatag na sa nagbangot nga pamilya ang hustisya nga ilang ginapangayo.
“Atong gipanawagan sa atong mga awtoridad nga tagaan ug lalom nga imbestigasyon ang mga sirkumstansiya sa iyang pagkamatay aron dali-daling maparusahan ang sad-an ug makab-ot sa iyang pamilya ang ginadahom nga hustisya,” matud ni Dayanghirang.
Mibungat usab ang gobernador nga usa siya ug ang iyang pamilya sa tibuok probinsya sa paghalad og pahasubo ngadto sa pamilya ug tagasuporta ni Kap Ronnie, kinsa nawad-an og usa la “amahan, lider, ug higala.”
Nanawagan usab siya sa katawhan nga mamalandong sa kabilihon sa kinabuhi isip pamaagi sa pag-obserba sa Semana Santa.
Sa pikas bahin, kasamtangan nang gina-imbestigahan sa Mati PNP ang mga posibleng motibo sa pagbuno kang Valera.
Sa ilang inisyal nga imbestigasyon, gibutyag ni Mati PNP Chief Police Lieutenant Colonel Ernesto M. Gregora nga samtang nagapahulay si Valera, kalit nga misulod ang suspek sa iyang panimalay sa Purok Matahimik-1 ug gipusil kini sa ulo gikan sa luyo.
Dali pang gidala si Valera sa Davao Oriental Provincial Medical Center, apan gideklara na kining dead on arrival sa Triage Doctor ug attending physician nga si Dr. Jinnih O. Mai.
Naglusad na sab ang Mati PNP og hot pursuit operation batok sa sad-an. Nakigkoordinar na sab sila sa 2nd Davao Oriental Provincial Mobile Force Command (DOPMFC), Davao Oriental Police Provincial Office – Police Investigation Unit (DOPPO-PIU), Criminal Investigation and Detection Group (CIDG) Davao Oriental, ug sa ilang counterparts gikan sa Armed Forces of the Philippines (AFP), aron paspas nga maimbestigahan ang maong krimen ug aron matino na usab ang suspek niini.