By: April Therese Tan
Si kanhi secretary Department of Tourism Ace Durano inspirado sa mga istorya kung unsa kalig-on ang mga Cebuanos atol sa ilang gipahigayon nga relief operations sa mga lugar nga gigusbat ni bagyong Odette, nisaad nga padayon pa gihapon ang maong operasyon sa umaabot nga adlaw.
Si Durano niangkon nga gamay ra ang ilang hinabang apan kini kinasing-kasing.
“Kabalo ko nga gamay ra kaayo ni siya pero ug mangayo ra ko daan dispensa sa atong mga kaigsuonan nga dili ta makahatag ug dako, pero atong hinabang kinasingkasing ug kani, pina-agi ani, nanghinaut ta nga matabangan sad nato ang gobyerno. Karong panahona, tinabangay tang tanan,” matud pa ni Durano sa iyang giluwatan nga press statement.
Matud pa sa Cebu gubernatorial nga kandidato nga nakalikom lang sila og P180,000 apan nigasto og P1,820,000 alang sa relief operations sa Bakud Alang sa Kauswagan ug Demokrasya (BAKUD), ang dakong political party nga gipanguluhan sa mga Durano sa ikalimang distrito sa Cebu.
Ang relief assistance ni Durano naglangkob kini og cash ug bugas nga gipanghatag ngadto sa siyudad sa Mandaue, Danao, Talisay ug Naga lakip na ang mga lungsod sa Compostela, Liloan, Cordova, Minglanilla, Sibonga ug Argao.
“Grabe nga kalisud ang gi-agihan sa atong mga kaigsuonan. Ang uban nila, wala na’y tarong pinuy-anan, maglisud pa gani pangita ug tubig mainum, pero dako gyapon kaayo ilang ngisi, kusug gyapon ilang katawa sa among mga relief operations,” matud pa ni Durano.
Sa nahinumduman, pag Enero 4, 2022, si Durano nakigtagbo sa iyang mga partners sa nagkada-iyang munisipyo aron sa pag facilitate sa pinansyal nga hinabang nga tag P100,000 matag lokal nga kagamhanan diin ni tutal kini og P1.2 milyones
Ang mga lungsod nga nakadawat sa hinabang pinansyal mao ang Argao, Asturias, Alcantara, Alegria, Badian, Barili, Consolacion, Cordova, Oslob, Pinamungajan, San Fernando, Sibonga ug ang siyudad sa Toledo.
Si Durano nidonar usab og 12 ka generator sets aron sa pagtabang sa mga lugar sa Cebu nga hangtud karon wala pa gihapon koneksiyon sa kuryente.
Dugang pa ni Durano nga ang iyang grupo padayon ang paghatag og ayuda apan gamay lang kini isip suporta sa mga ayuda nga iyang katungdanan sa gobyerno.
“Kini ato gamay ra ni kay personal ra nga support pero unta makatabang. Pero manghinaot ta nga makuha na gyud sa tanan ang tabang gikan sa Kapitolyo kay sa atong paglibot, daghan paman gyud ang muingon na wala pa sila kadawat sa tabang. Daghan pa gyud ang galisod. Magtinabangay lang ta hangtud makabangon gyud ang Sugbo,” asoy pa ni Durano.