By Jim Lloyd Dongiapon
Human ang lapas 40 ka tuig sa drawing board, hingpit na gayud nga mamahimong realidad ang Samal Island-Davao City Connector Project (SIDC), nga nailhan usab isip Davao-Samal Bridge, human gikumpirma nio Department of Public Works and Highways Undersecretary Emil Sadain nga gitakda na ang groundbreaking ceremony alang sa proyekto sa Hulyo karong tuiga.
Kini human gipirmahan na sa mga gobyerno sa Pilipinas ug People’s Republic of China signed ang framework ug loan agreements alang sa pagpatukod sa maong tulay kagahapon, Hunyo 13.
Girepresentar ni Department of Finance Secretary Carlos Dominguez III ang Pilipinas samtang si Chinese Ambassador to the Philippines Huang Xilian ang mirepresentar sa China
Mi-post sa iyang official Facebook page si Huang nga maggahin ang gobyerno sa China og concessional loan nga mukantidad og kapin US$350 million kon₱18.63 billion aron pondohan ang proyekto
Gikaingon usab niya nga ang SIDC project momugna og mga trabaho nga makatabang aron makabawi ang lokal nga ekonomiya ug aron mapaayo usab ang panginabuhian sa mga residente sa duha ka dakbayan.
Sa higayong matapos na kini, sumala niya, ang tulay makapauswag sa kahusayan sa transportasyon, makapalambo sa internal nga paglihok, ug makapadasig sa potensyal sa turismo.
Ang SIDC usa ka two-way four-lane nga tulay nga dunay gitas-ong 3.86 kilometros, diin ang main brigde anaa sa 1.62 kilometros ang gitas-on.
Pagatukuron kini patabok sa Pakiputan Strait, ug mukonekta kini sa Samal Circumferential Road sa Barangay Limao, Island Garden City of Samal ngadto sa Davao City tunga sa R. Castillo-Daang Maharlika junction.
Gitarget nga mahuman ang SIDC sa tuig 2026.
Ang maong proyekto gisugyot na niadto pang tuig 1979 ni kanhi Davao del Norte Assemblyman Rodolfo del Rosaro, apan nakasugat kini og mga babag sa mga katuigan sama sa pondo, road right of way, feasibility challenges, ug mga Writ of Kalikasan.