By Jim Lloyd Dongiapon
Gipangunahan sa lokal nga panggamhannan sa Davao City, pinaagi sa City Social Welfare and Development Office (CSWDO), ang paghandum sa ika-20 nga anibersaryo sa Davao Airport Bombing, usa ka pag-atake sa mga terorista nga mikulto sa kinabuhi sa 22 ka two niadtong Marso 4, 2023.
Sa mismong ground zero, sa karaan nang Davao Airport building sa Barangay Sasa, ang mga representante sa lokal nga panggamhanan, sa pagpanguna ni Davao City Mayor Sebastian “Baste” Duterte, mga opisyal sa Barangay Sasa, ug mga pamilya sa mga biktima ang mihalad og pag-ampo, mga bulak, ug kandila.
Sa iyang mubo nga mensahe, giawhag ni Mayor Duterte ang mga pamilya sa mga biktima nga magpadayon lamang sa kinabuhi bisan pa man nakasinati sila og mga kalisdanang ilang gi-antos sulod sa milabayng 20 ka tuig, ingon man ang pagsalig sa Ginoong Diyos.
Kinatibuk-ang 127 ka benepisyaryo, kadaghanan niini gikan sa mga pamilya sa mga namatay ug nangaangol, ang padayong nagadawat og hinabang gikan sa CSWDO.
14 ka mga nakadawat og hinabang gikan sa programa sa opisina ang nakakompleto na sa ilang mga college degree sa pagkakarong tuiga.
Martes, Marso 4, 2023, pasado alas 5:20 sa hapon, gipabusikad sa wala mailhing mga lalaki ang usa ka improvised explosive device sulod sa usa ka backpack duol sa waiting lounge sa passenger terminal building sa Francisco Bangoy International Airport.
Human sa pag-atake sa mga terorista, 22 ka tawo ang namatay ug 155 ang nangaangol.
Sa samang adlaw, duha ka lain pang pagbusikad ang gikataho sa Davao City Overland Transport Terminal sa Ecoland ug gawas sa usa ka health office sa Tagum City, Davao del Norte, diin tulo ka tawo ang samdan.
Nagtuo ang gobyerno sa Pilipinas nga ang pagpamomba gipaluyohan sa Moro Islamic Liberation Front (MILF), usa sa mga grupo nga nangulo sa secessionist movement sa Mindanao sulod na sa pipila ka dekada niadtong tungora.
Giangkon sab sa usa ka mga labaw sa Abu Sayyaf Group, nga dunay koneksyon sa Al-Qaeda ni Osama bin Laden, ang responsibilidad niini. Apan, gisalikway sa gobyerno sa Pilipinas ang ilang pag-angkon.
Gipanghimakak sab kinadugayan sa MILF ang ilang kalambigitan sa maduguong pag-atake.
Ang 2003 Davao Airport bombing usa sa pipila ka terrorist attacks nga nasinatian sa Davao City sa mga milabayng katuigan. Ang pinakaulahi niini mao ang September 2, 2016 Roxas Night Market Bombing, nga mipatay sa 14 ka tawo ug miangol sa 70 ka uban pa.
Tungod niining mga panghitabo, kanunay na karong ginapakusgan sa dakbayan ang kultura sa seguridad niini pinaagi sa regular nga simulation exercises nga nagasukod sa abilidad sa security cluster ug sa publiko sa pagresponde ug sa pagabuhatong reaksyon sa susamang mga hulga sa seguridad.