By Margaret Padilla
–
Ang “Black Rainbow,” isang Filipino short film na isinulat at idinirek ni Zig Madamba Dulay tungkol sa isang batang Aeta na nangangarap maging abogado, ay nanalo ng Best Short Film award sa 2022 Harlem International Film Festival sa New York, United States.
Ang 20-minutong pelikula, na unang pinalabas noong Agosto 2021 sa Sine Halaga Film Festival (o ang Negros Cultural Foundation, Inc. (NCCA) Filipino Values Film Festival), ay tungkol sa isang batang Aeta na ang realidad ay naging hamon sa kanyang mga pangarap habang siya ay naghahanda upang nakapagtapos ng elementarya.
Ayon sa pahayag ni Dulay sa isang panayam ng Inquirer Entertainment, “the fact that it was chosen to be screened in an international festival is already more than enough for me, especially since we’re in the middle of a pandemic at mahirap gumawa ng mga pelikula. Kaya naman malaking bonus na ang pagkapanalo ng award.”
“At saka, hindi lang ito ipinakita sa mga dayuhang manonood sa ibang bansa, kinilala at ginawaran din ito para sa mga merits nito. Ibig sabihin, matagumpay na naiparating ang kuwento, (at ipinapakita) na ang mga sitwasyon at karanasan ng ating mga kapatid na Aeta ay naramdaman at naunawaan ng mga tao mula sa iba’t ibang bahagi ng mundo,” aniya.
Ang “Black Rainbow,” ay tungkol sa kwento ni Itan, isang batang Aeta na naghahangad na maging isang abogado upang maprotektahan niya ang kanyang komunidad mula sa mga higanteng korporasyon na nagtatangkang sakupin ang kanilang mga lupaing ninuno para sa pagmimina. Gayunpaman, tutol ang kanyang mga magulang na ipagpatuloy niya ang kanyang pag-aaral. Mas gusto ng kanyang ama na tulungan siya ng kanyang anak sa bukid at sa pangangaso ng pagkain para sa pamilya.
Nang maglaon, nakakita si Itan ng pagkakataon na baguhin ang kanyang buhay at kapalaran nang malaman niya ang tungkol sa scholarship na inaalok ng kanilang lokal na pamahalaan. Gayunpaman, nagkaroon siya ng pag-agam-agam dahil nalaman niyang kailangan niya ng kaalaman sa computer upang maging qualified sa nasabing scholarship. Sa kabila ng mga balakid, sinubukan niya ang kanyang makakaya upang matutunan ang paggamit ng isang lumang keyboard na itinapon na.
Ang pelikula ay kinunan sa mga kabundukan ng Central Luzon, at ang cinematography at story imagery ay pawang nakamamangha. Sumasalamin rin ito sa iba’t ibang Filipino values, tulad ng Pamilya, Pagkatao, Edukasyon, Kabuhayan, Kapayapaan at Kaunlaran, Katapatan, Katatagan, Buhay at Tunguhin, Karapatang Pantao, et al.
Ayon kay Dulay, “ang pagkilalang ito ay magsisilbing hamon para sa akin na magpatuloy, na ipagpatuloy ang paglikha ng mga pelikulang hindi lamang nagbibigay-aliw, kundi pati na rin ang mga isyu at sitwasyon na nararanasan ng mga Pilipino araw-araw. The goal is to create representations, as well as give space and voices to marginalized sectors of our society. I consider this award as a dare to make more powerful films that enlighten and liberate the audience.”
Sina Joyce at James Scott, ang mga producer ng Uncle Scott Global Productions ang tumanggap ng parangal sa ngalan ni Dulay.
Samantala, dadalo ang direktor sa 2022 Kas International Short Film Festival sa Turkey mula Hunyo 2 hanggang 5, kung saan muling ipapalabas ang “Black Rainbow”.