Share:

By Jim Lloyd Dongiapon
––

Gikataho sa state media nga PTV karong adlawa, Agosto 24, nga nagpahigayon og sorpresang pagbisita ang mga ahente Bureau of Customs (BoC), nga naglihok subay sa mando gikan sa Office of the President (OP), ngadto sa pipila ka bodega sa asukal sa Cagayan de Oro City kagahapon, Agosto 23, isip kabahin sa nagapadayong kampanya sa administrasyong Marcos batok sa mga nagapangtipig og asukal ug sa mga nagapangginansiya nga nalambigit sa nagapadayong krisis sa asukal sa nasud.

Gisangkapan sa Letter of Authority (Reference No. 08-22-165-2022) ug sa Mission Order (No. 08-22-2022-536), gisusi sa mga ahente sa BoC ang pipila ka mga bodega nga gipanag-iyahan sa Crystal Sugar Milling Inc. sa North Poblacion human makadawat og impormasyon nga alegasyong nalambigit ang mga tag-iya sa kompanya sa pagpangtipig og pundo sa asukal.

Mitabang sa mga ahente sa BoC gikan sa Region 10 (Northern Mindanao) atol sa pagpahigayon sa operasyon ang usa ka representante gikan sa Sugar Regulatory Administration (SRA), uban sab ang mga security personnel gikan sa mga lokal nga yunit sa Armed Forces of the Philippines (AFP) ug Philippine National Police (PNP) nga nadestino sa lungsod sa Maramag.

Kapin kon kulang 466,142 ka sako sa raw sugar ang nakaplagan sa tulo ka bodega sa Crystal Sugar Milling, sumala sa imbentaryo sa Customs Intelligence and Investigation Service (CIIS). Bisan ang 264,000 ka sako na ang nabaligya ngadto sa mga magpapatigayon, wala pa kini gipangkuha sa maong mga bodega.

Matud ni Javier Sagarbarria, kinsa giila nga warehouse manager sa Crystal Sugar Milling, nagagama og anaa sa duha ka milyon ka sako sa asukal ang kompanya matag tuig.

Sa dihang gipangayuan na siya sa BoC-CIIS og mga kopya sa mga sugar transaction document aron pamatud-an nga awtorisado ang nbadiskubrehang pundo nila sa asukal, miingo kini nga “wala ang naghupot o nag-alima sa mga dokumento.”

Sa wala pa’y usa ka semana, sagunsong mga inspeksyon na sa mga bodega sa asukal ang gihimo sa BoC, SRA, ug sa Department of Agriculture (DA) sa Deparo, Caloocan City; Balut sa Tondo; San Nicolas sa Manila; Rosales, Pangasinan; San Fernando, Pampanga; Ibaan, Batangas; ug Davao.

Niadtong nakalabayng weekend lang, upat ka mga bodega sa Guiguinto, Bulacan ang hiniusang giinspeksyon sa BoC, SRA, ug DA, diin dili mominus sa 60,000 ka sako sa gidugahang gitipig nga asukal ang nakaplagan.

Human sa pagkakaplag sa ang dakong gidaghanon sa mga asukal sa mga bodega sa Luzon ug Mindanao, nakahinapos ang Malacañang nga ang nasinatiang kanihit sa asukal “artificial” lamang tungod sa pagpangtipig sa mga magpapatigayon aron lamang makaginansiya gikan sa wala damhang pagsaka sa presyo sa asukal.

Kasamtangan nang ginatutokan sa Kamara de Representates ug Senado ang kapakyasan sa suplay sa asukal nga naggikan sa kontrobersyal nga Sugar Order Number 4, nga nag-apruba sa importasyon sa 300,000 metriko tonelada (MT) sa asukal nga wala’y pagtugot ni Presidente Marcos, Jr.

Leave a Reply