By: April Therese Tan
Samtang nagpabiling lig-on ang Cebu ug ang mga Cebuano human gikuso-kuso ni bagyong Odette og makasinati og kakuwang sa kuryente og internet connection, ang nagkada-iyang lokal nga kagamhanan naghimo og libreng charging stations ug work from home areas sa tinguha nga maibsan ang pag-antos sa ilang mga residente.
Sa Talisay City, si Mayor Gerard Anthony “Samsam” Gullas, ang pirmerong mayor nga nakamugna og work from home areas duol sa city hall diin adunay kini operasyon nga 24/7.
Samtang iyang nakita nga nagkadaghan gyud ang nagkinahanglan og internet connection labi na sa nag work from home nga mga empleyado, adunay plano ang mayor nga palapdan kini og ni apelar ngadto sa mga internet provider nga libreng ipagamit nila ang ilang mga internet connection.
Sa lungsod sa Liloan, si Mayor Christina Garcia- Frasco adunay usab susamang serbisyo sa Talisay City sugod karong adlawa, Enero 12, 2022 adto sa Liloan Municipal Hall Plaza sugod alas 9:00 sa buntag hangtod alas 7:00 sa gabie.
“The Liloan free co-working space is a service we are giving for FREE to help those whose homes have not yet been energized. Wala’y bayad, wala’y pili,” matud pa ni Mayor Garcia-Frasco sa iyang mensahe.
Si Consolacion Mayor Joannes Alegado nagkanayon usab nga ang work from home spaces magsugod sa alas 6:00 sa buntag hangtod alas 6:00 sa gabie karong Enero 14, 2022 adto sa Vice Mayor’s Conference Hall ug ABC Session Hall, nga naa sa ikatulong andana sa Consolacion Government Center.
Samtang sa Lapu-Lapu City, si Lone District Representative Paz Radaza naghatag ngadto sa iyang mga ginsakupan og libreng mobile charging stations ngadto sa 19 barangays sa mainland ug walo ka island barangays sa maong siyudad.
Matud pa ni Radaza nga ang mobile charging stations magpundo sulod sa duha ka oras sa usa ka barangay ug mobalhin na sad sa laing barangay aron mas daghan ang makatagamtam sa maong serbisyo.