By Jim Lloyd Dongiapon
Usa ka taga-Mindanao nga magbabalaod ang nagaduso og balaodnon sa Kamara de Representantes nga magtugot sa mga babayeng empleyado sa nasud nga mahatagan og duha ka adlaw nga menstruation leave.
Giduso ni North Cotabato 3rd District Representative Maria Alana Samantha Taliño-Santos ang House Bill (HB) No. 6728, nga dunay titulong, “An Act granting menstruation leave of two (2) days a month with fifty (50) percent daily remuneration to all female employees in the private and public sectors”.
Sama sa gipasabot sa ngalan sa sugyot balaodnon, tugotan ang mga babayeng trabahante nga mopahulay og duha ka adlaw matag bulan tungod sa regla samtang makadawat gihapon og katunga sa ilang regular nga inadlaw nga sweldo.
Gipunto ni Santos nga pipila na ka mga nasud, lakip na ang Japan, South Korea, Taiwan, Indonesia, Spain, ug Zambia, ang nagahatag na sa maong pribilehiyo ngadto sa mga babayeng trabahante.
Dugang pa niya, bisan pa man nga pipila na ka pribadong kompanya ang nagatugot na sa menstrual leaves, matagak gihapon kini ubos sa sick leaves sa mga trabahante.
Kung hingpit man kining mahimong usa ka balaod, miingon ang magbabalaod nga ang empleyado dili mamahimong tangtangon, i-demote, o pasination og pagpihigpihig tungod lamang sa menstrual leave.
Ang mga employer nga mapakyas sa pagtuman sa mga probisyon sa gisugyot nga balaodnon posibleng moatubang og ₱50,000 nga multa o unom ka bulan nga pagkabalhog sa prisohan.
Sa karon, nakapundo pa ang HB 6728 ngadto sa House Committee on Labor and Employment.