By Jim Lloyd Dongiapon
Nakatakda nga magpahigayon ang Metropolitan Davao Development Authority (MDDA) og benchmarking didto sa Metropolitan Manila Development Authority (MMDA) sa bulan sa Pebrero karong tuiga, isip kabahin sa pagpatuman sa enabling law niini, ang Republic Act No. 11708.
Gikabutyag ni Alex Roldan, regional director sa Department of Interior and Local Government (DILG) sa Davao, nga ang katuyoan sa benchmarking mao ang pagsukod sa kung paunsa ginapatuman sa MMDA ang mga regulasyon niini sa 16 ka dakbayan ug usa ka lungsod sa National Capital Region, nga mamahimo usab nga mapatuman sa Metro Davao.
Ang paghiusa sa mga nagkadaiyang ordinansa gikan sa mga local government unit sa Metro Davao, sama sa balaod trapiko, ang usa sa ilang mga prayoridad, segun ni Roldan.
Susihon usab nila ang mga kalisdanang nasinatian sa MMDA sa pagpatuman sa mga regulasyon niini aron nga makamugna og mga estratehiya ang MDDA aron malikayan ang susamang mga hagit sa umaabot.
Ginalauman sab sa opisyal nga sa higayong hingpit nang molihok ang ahensya, mamahimong hapsay ang pagpatuman sa mga regulasyon latas sa Metro Davao.
Namugna ang MDDA niadtong Abril 13 sa milabayng tuig, human sa pagpirma ni kanhi Presidente Rodrigo Duterte sa RA 11708.
Ang MDDA dunay 15 ka local government units ubos sa hurisdiksyon niini, nga mao ang: Davao City; mga dakbayan sa Panabo, Tagum, ug Samal, ug ang lungsod sa Carmen sa Davao del Norte; Digos City ug mga lungsod sa Santa Cruz, Hagonoy, Padada, Malalag, ug Sulop sa Davao del Sur; Maco sa Davao de Oro; Malita ug Santa Maria sa Davao Occidental; ug Mati City sa Davao Oriental.
Ang mga mosunod nga responsibilidad pagabuhaton sa maong development authority: development planning; transport management; solid waste disposal and management; flood control and sewerage management; urban renewal, zoning, land use planning, shelter services; health and sanitation, urban protection, and pollution control; ug public safety.
Langkuban sa chairperson sa Regional Development Council, mga gobernador sa mga probinsya sa Davao del Norte, Davao del Sur, Davao Oriental, Davao de Oro, ug Davao Occidental, ug ang 15 ka alkalde sa mga nasangpit nga dakbayan ug lungsod, ang MDDA council, nga mao’y modumala ug momugna sa mga palisya alang sa mga LGU ubos sa hurisdiksyon niini.
Nakatakda usab nga itudlo ni Presidente Ferdinand “Bongbong” Marcos, Jr., ang unang chairperson sa maong authority gikan sa mga ginominar sa konseho. Siya magsilbi sulod sa tulo ka tuig nga termino.
Ang tanang chief executives sa 15 ka LGU ang gikonsiderang ex-officio members sa maong konseho.