By: Jim Lloyd Dongiapon
Gibalhog sa prisohan sa mga awtoridad ang duha ka content creator human sila mibuhat og prank pinaagi sa pag-inom og gasolina gikan sa botelya sa soft drink duol sa usa ka gasolinahan sa lungsod sa Mawab, Davao de Oro.
Nahitabo ang maong insidente niadtong Miyerkules, Enero 18, kanus-a gikuhaan og video nila Jonel C. Cordero, 29, lumulupyo sa Barangay Andili, ug iyang amigo, si Arnold O. Rabi, 32, nanimuyo sa Barangay Nueva Visayas, ang prank alang sa ilang Facebook page nga “Cordero Brothers,” nga nailhan sa susamang mga video.
Gikataho sa Mawab Municipal Police Station nga pasado alas 2:00 sa hapon atong adlawa, miadto si Cordero sa Green Planet Gasoline Station sa Barangay Nueva Visayas aron mopalit og tag-Php10 nga balor sa gasolina ug gisulod kini sa usa ka botelya sa soft drink.
Human mipalit sa gasolina, miaksyon siya nga daw giinom niya kini samtang ginakuhaan kini sa iyang higala. Nagpakaaron-ingnon siya nga nalipong ug nagsuka duol sa gasolinahan, hinungdan nga nagkaguliyang ang mga trabahante nga nag-duty niadtong tungora.
Daling nangayo og tabang ang mga trabahante sa gasolinahan ngadto sa Mawab Municipal Disaster Risk Reduction and Management Office (MDRRMO), ug sa dihang miabot na ang mga emergency responder, nagpadayon ang vlogger sa pag-akto nga daw makuyapan na kini.
Sa dihang gipangutana siya sa usa sa mga emergency responder kung maayo ba ang iyang gibati, diha na siya mitubag nga usa lamang ka prank ang tanan.
Nasayran sab nga energy drink ra diay ang unod sa botelyang iyang giimnan.
Wala malipay ang emergency responders sa nahitabo, ug sa katapusan gipangdakop ang duha.
Nahimo usab nga viral ang maong video sa Facebook, nga nakaani og lahi-lahi nga mga reaksyon gikan sa mga netizen.
Nabalhog sila sa prisohan og 14 ka oras sa Mawab Municipal Police Station, ug gibuhi-an sila Huwebes sa buntag, Enero 19.
Posible silang mag-atubang og kasong paglapas sa Article 155 sa Revised Penal Code, kon “Alarms and Scandals.”
Samtang, nagpahimangno ang Mawab MDRRMO sa publiko nga dili mobuhat og mga prank nga may kalabutan sa mga emerhensiya.
“Wala man mo gibawalan nga maglingaw-lingaw anang inyong PRANKS apan hangyo lang mi, ayaw intawon idamay kining emergency concerns kay maka-create ug panic sa katawhan o publiko,” pahayag sa Mawab MDRRMO sa Facebook post niini.
Naghinaut usab ang buhatan nga dili na masubli pa ang susamang insidente, ug mihangyo sila og kooperasyon gikan sa publiko aron magpabilin malinawon ug mapahilayo sa bisan unsa mang matang sa kadaot ang ilang lungsod.
Kagahapon, personal nag mibisita ang Cordero Brothers sa headquarters sa Mawab MDRRMO aron ipadayag ang ilang pagmahay ngadto sa ilang gisakitang mga emergency responders.
Giklaro usab nila nga naatol lamang nga ilang gibuhat ang prank duol sa headquarters sa MDRRMO ug wala usab sila’y intensyon nga pasakitan ang mga rescuer.
Dugang pa niana, nagpasalig sila nga dili na ila usabon ang samang mga kasaypanan sa ilang umaabot nga mga video.