By Jim Lloyd Dongiapon
Giawhag sa New Zealand Embassy in Manila ang mga taga-Mindanao, partikular na kadtong Indigenous Peoples (IPs) ug Moro, nga mo-apply alang sa Manaaki New Zealand Scholarships.
Milibot si New Zealand Ambassador Peter Kell sa Davao City ug Cagayan de Oro City aron ipasiugda ang ilang government-sponsored scholarship grant.
Gikaingon ni Kell sa usa ka press conference nga gipasiugdahan sa Philippine Information Agency XI nga ang scholarship bug-os nga gipondohan sa gobyerno sa New Zealand ug kini nagsilbi isip kabahin sa ilang suporta sa proseso sa peace-building sa Pilipinas.
Dugang niya, ang pag-awhag sa mga IP ug Moro sa pag-apply alang sa scholarship usa ka pamaagi sa pagdasig sa etnikong kabilin, representasyon, ug pagka-inklusibo—nga kinasingkasing nilang gisuportahan.
“This is not just about studying in New Zealand but also learning how New Zealand and New Zealanders see the world. We are trying to open New Zealand to all Mindanaoans, particularly those who are from indigenous and Moro communities (Dili lang kini mahitungod sa pagtuon sa New Zealand kondili sa pagkat-on usab kon giunsa paglantaw sa mga taga-New Zealand ug sa nasud New Zealand ang kalibutan. Kami naningkamot nga i-abli ang New Zealand sa tanang mga taga-Mindanao, partikular na sa mga gikan sa mga lumad ug mga Moro nga komunidad),” matud niya.
Gani, gipadayag kini pinaagi sa bag-ohay lang nga pagtunol sa Davao City Chamber of Commerce and Industry, Inc. sa Partnership Commendation Award ngadto sa New Zealand Embassy isip pag-ila sa ilang padayon nga suporta sa chamber, partikular na sa “Uplifting of IP Women Project in Davao City.”
Ang Manaaki New Zealand Scholarship abli alang mga Filipino nga ubos sa 40 anyos nga gustong mopadayon sa ilang master’s ug doctorate studies sa New Zealand.
Gihisgotan usab sa ambahador nga ang prayoridad nga mga panulun-an alang sa postgraduate studies mao ang climate change and environment, renewable energy, food security and agriculture, indigenous studies, peace and conflict studies, disaster risk reduction, ug cultural diversity.
16 lamang ka Filipino nga aplikante ang dawaton alang sa scholarship program.
Ang mga interesado nga aplikante mahimong mobisita niini nga website aron mo-apply:
Ang rehistrasyon kutob lamang karong Pebrero 28, alas 12:00 sa udto, oras sa New Zealand (alas 7:00 sa buntag, oras sa Pilipinas).