By Christian Dee
MAYNILA – Magsasagawa ng imbestigasyon ang National Bureau of Investigation sa pagkamatay ni John Matthew Salilig, ang estudyante ng Adamson University na nasawi dahilan ang diumanong hazing.
Ito ay matapos ipag-utos ni Department of Justice Secretary Jesus Crispin “Boying” Remulla nitong Miyerkoles sa NBI ang pagsasagawa ng parallel investigation sa naturang kaso.
“The Secretary has already asked the NBI to conduct a parallel probe into the alleged hazing death,” anang Assistant Secretary at tagapagsalita ng ahensya na si Jose Dominic Clavano.
“We hope to shed light on this issue,” dagdag pa niya sa kanyang text message sa mga mamamahayag.
Ani Clavano, inilabas ni Remulla ang direktiba habang dumadalo sa ika-52 session ng United Nations Human Rights Council (UNHRC).
Natagpuan sa Imus, Cavite ang katawan ni chemical engineering student na si Salilig noong Martes, Pebrero 28, ilang araw makalipas mula noong siya ay nawala.
Itinuro ng isang miyembro ng fraternity na sinalihan ng biktima ang lugar kung saan inilibing ang labi nito at natunton ng mga awtoridad.
Sa paunang imbestigasyon ng mga awtoridad, nakita ang ilang mga bakas ng hazing sa katawan ni Salilig.
“The Department condemns any violation of Republic Act 11053 or the Anti-Hazing Law. However, we will await any case that will be filed before our prosecutors. Rest assured, any forthcoming case will undergo diligent evaluation,” ani Clavano.
“If probable cause with reasonable certainty of conviction is found, we will prosecute the case until the perpetrators of this crime are finally brought to justice,” dagdag pa niya.
