By: Margaret Padilla
Inihayag ng Netflix ang pinakamalawak nitong 2023 content lineup ng South Korean TV series, pelikula, at unscripted na palabas.
Sa 34 na bago at nagbabalik na mga palabas na nakatakdang mag-umpisa sa taong ito, ginawa ng streaming giant ang anunsyo noong Martes.
Ayon kay Don Kang, vice president of content (Korea), ang global appeal ng K-content ay tumaas nang husto noong 2022, kung saan ang Netflix ay nagdadala ng mas malawak na seleksyon ng mga kwento at genre sa mga tagahanga sa buong mundo.
Sinabi niya na sa nakaraang taon, ang mga serye at pelikulang Koreano ay patuloy na lumabas sa listahan ng Global Top 10 ng Netflix sa mahigit 90 bansa, at tatlo sa pinakapinapanood na palabas ng Netflix ay mula sa Korea.
“This year, we’re pushing the envelope even further with the stories we tell and how we tell them. With this lineup of Korean titles, Netflix will continue to be the ultimate destination for compelling, diverse, and must-watch Korean storytelling,” aniya.
Kabilang sa halos tatlong dosenang bagong programa ang iba’t ibang serye sa telebisyon at pelikula mula sa mga thriller hanggang sa mga drama.
Iniulat ng CNN na pinapataas ng Netflix ang produksyon nito ng orihinal na ‘international content’ at nakatuon sa mga ‘international prospects.’
Ayon sa pinakahuling kita ng kumpanya, nagdagdag ang Netflix ng 1.4 milyong bayad na subscriber sa Asia Pacific sa ikatlong quarter, na ginagawa itong pinakamabilis na lumalagong rehiyon ng kumpanya.