Unom ka buwan gikan sa pagsugod sa pagpamakuna sa COVID-19 nga bakuna sa Central Visayas, nilapas na sa duha ka milyon ka dosis ang naturuk, matud pa sa Visayas Covid-19 Vaccination Operations Center (VVOC) kagahapong adlawa.
Nagkanayon si VVOC spokesperson Mary Jean Loreche sa iyang briefing nga adunay nay 2,233,645 ka dosis nga naturok pag Septembre 9, 2021 diin
1,280,567 ka dosis ang giturok sa pirmirong dosis ug 953,078 ka dosis sa ikaduhang dosis.
Sa Cebu, adunay total nga 1,664,043 ka dosis ang naturok diin 997,652 sa pirmirong dosis ug 666,391 sa ikaduhang dosis.
Samtang ang kinatubuk-ang dosis naturok sa Bohol kay 287,029; 224,309 sa Negros Oriental; ug 58,264 sa Siquijor.
Sa Cebu lamang, hapit na moabot ngadto sa usa ka milyon ka dosis (997,652) ang naturok sa pirmirong dosis ug 666,391 sa ikaduhang dosis.
Samtang aron mapaspas ang pagmakuna sa Cebu Province, ang Office of the Presidential Assistant for the Visayas nipatawag og miting sa mga volunteers nga sakop sa Cebu Vaccination Group inubanan sa nagkadaiyang ahensiya sa gobyerno aron mabahin ang Cebu sa lain-lain nga sector alang sa mas detalyado nga kampanya sa pagpamakuna.
Sa Norte, ang Sector 1 langkuban kini sa Liloan-Danao City ug Camotes Island; Sector 2 gikan sa Carmen padung sa Sogod; Sector 3 gikan sa Borbon padung sa Bogo City; Sector 4 gikan sa Medellin padung sa Daanbantayan ug Bantayan Island; Sector 5 gikan sa San Remegio padung sa Tuburan; ug Sector 6 gikan sa Balamban padung sa Asturias.
Samtang sa South, langkuban kini sa Sector 1 gikan sa City of Naga padung sa Carcar City; Sector 2 gikan sa Sibonga padung sa Dalaguete; Sector 3 gikan s Alcoy padung sa Oslob; Sector 4 gikan sa Samboan padung sa Malabuyoc; Sector 5 gikan sa Alegria padung sa Alcantara; Sector 6 gikan sa Ronda padung sa Barili; ug Sector 7 gikan Aloguinsan padung sa Toledo City.
Matud pa sa OPAV ang tumong ug tuyo sa maong pamaagi mao ang pagkab-ot sa herd immunity sa Cebu sa mas labing dali nga panahon