Niluwat og bag-ong Executive Order No. 137 si Acting Cebu City Mayor Mike Rama aron sa pag paglusad sa “Oplan Puyo” gikan Agosto 16 hangtud Agosto 31, 2021 alang sa implementasyon sa hybrid Modified Enhanced Community Quarantine nga mga protokol.
Matud pa ni Rama sa iyang press statement nga ang “heart and soul” sa maong EO nagmando kini og Mandatory Stay at Home Order (MSAHO) ug nag-awhag kini sa iyang mga ginsakupan nga mogawas lang kung adunay gikinahanglan o importante nga trabaho ug pagtubag sa mahinungdanon nga panginahanglanon.
Nanawagan usab ang acting mayor ngadto sa mga ginikanan o sa mga tigulang nga sa sakop sa pamilya nga ipatuman ang “Parental-Supervised Household Lockdown”.
Ang maong responsibilidad, matud pa ni Rama apil na niini kadtong mga giila nga lider sa compound, village, sitio ug barangay, ingon man sa simbahan ug mga aktibong organisasyon sa kumunidad.
Dugang pa ni Rama ang mga opisyales sa barangay dako ang ilang papel kay gihatagan sila og gahum sa paghimo sa ilang kaugalingong “Barangay Territorial Management” aron dili na mas mukuyanap ang COVID-19 ug makipagtambabayong sa ilang mga silingan nga barangay ug magsabot sa utlanan alang sa
“Inter-Barangay Boundary Management”.
Pina-agi sa kapulisan, ang Cebu City government mo koordinar sa siyudad sa Talisay ug Mandaue ug sa upland barangay sa Balamban alang sa “Inter-LGU Perimeter Manning Protocol” aron sa pagsiguro nga ang otorisado o gitugutan ba ang lihok sa katawhan.
Dugang pa ni Rama gikinahanglan nga buhaton kini aron sa pagsugpo sa pagkuyanap sa COVID-19 labi na adunay Delta variant nga paspas kaayo nga makatakod sa katawhan.