Ang Department of Public Works and Highways-Cebu 6th District Engineering bag-o lang gi-inagurahan ang usa ka multi-purpose building, road asphalting nga adunay solar nga suga ug drainage system sa barangay Babag, Lapu-Lapu City, Cebu.
“Kining atong infra projects labi naning drainage subay kini sa atong tinguha nga atong masulbad ang problema sa baha sa atong dakbayan”, matud pa ni Lapu-Lapu City Lone District Representative Paz Radaza.
Matud pa ni Radaza nga ang maong mga proyekto nalakip kini sa iyang mga prioridad nga proyekto.
Nagkanayon si Radaza nga P75 milyones ang gigahin sa DPWH diin ang tulo ka andana nga multi-purpose building nagkantidad kini og P10 milyones, ang 1.5 ka kilometro nga pag aspalto sa dalan nga adunay solar studs ug solar nga suga nagkantidad og P45 milyones ug ang 837 ka metros nga drainage system nga nagkantidad og P20 milyones.
Asoy pa ni Radaza nga ang multi-purpose building anhi ibutang ang day care center, livelihood center ug uban pang mga training nga ipahigayon.
“Dako akong kalipay nga ato na gyud magamit ang kining mao nga proyekto para ninyo taga Barangay Babag ug para sa tanang Oponganon nga maoy makabenepisyo ani atong proyekto” matud pa sa kongresista.
Dugang pa ni Radaza nga prioridad usab kaniya ang paghimo sa drainage kay lisud na og maparehas ang siyudad sa nahitabo sa Luzon ug sa ubang dapit sa Kabisay-an diin grabe ang pagbaha.
“Dili kita gusto nga mahitabo dinhi sa atong syudad ang grabe nga pagbaha busa karon, isip Kongresista, inyong makita ang atong mga kadalanan nga dunay mga ongoing drainage projects, atu-a kana gipabuhat pinaagi sa implementasyon sa DPWH-7 aron sa pagsulbad sa problema sa baha sa dakbayan,” dugang pa ni Radaza. (By: April Therese Tan)