By Jim Lloyd Dongiapon
––
“Ginoo na lang bahala, Sir. Dili na pod mi mag-asa og hustisya kay pobre man ta—basta pobre walay hustisya—pero nakakita man ang Ginoo [sa nahitabo]. Ginoo na bahala sa ila, karmahon rana sila,” mao kini ang pamahayag ni Joselyn Ferraren, inahan ni Paul John Dizon Ferraren, kinsa gipusil-patay adlawng tutok kagahapon, Agosto 11, sa Piapi Boulevard, Barangay 25-C sa Dakbayan sa Davao.
Siya hugot nga nagatuo nga maayong tawo ang iyang anak. Apan, miangkon siya nga wala siya nasayod sa mga ginabuhat sa iyang anak panahon nga kauban niini ang iyang barkada.
Mipadayag usab siya sa iyang kasuko ngadto sa mga tawo nga responsable sa pagkamatay sa iyang anak. Kung tinood gayud nga nalambigit ang iyang anak sa pagpangawat ug pagpanulis, miingon siya nga mas maayo unta kung giputlan na lang siya og tudlo imbes nga patyon kay mahatagan pa unta siya og kahigayunan nga maghinulsol.
Nagpadayon siya sa pag-ingon nga kasamtangang nanglisod ang ilang pamilya. sa pagpahiluna sa minatay sa iyang anak. Gawas pa niana, nanglisod usab sila sa pag-atiman ug pagsuporta sa upat ka mga anak nga iyang gibilin.
Kahinumduman nga gikataho kagahapon, Agosto 11, ni Sta. Ana Police Station Chief Police Lieutenant Colonel (PLt. Col.), nga ang namatay dunay kaagi sa pagpangawat ug pagpanulis, ug bag-ohay ra usab siyang nakagawas gikan sa prisohan dihang gipatay siya.
Nagapadayon pa ang malawmong imbestigasyon sa mga awtoridad ngadto sa krimen, ilabi na nga nahuptan na nila ang CCTV footage nga nakakuha sa maong insidente. Ginasusi usab nila ang tanang motibo, partikular na ang giingong pagkalambigit niini sa pagpangawat ug pagpanulis.