Share:

By Jim Lloyd Dongiapon
––

Usa ka planta sa iladongsoft drink brand nga nahimutang sa Ulas, Davao City, ang nagsuspinde na sa ilang operasyon tungod sa nagpadayong krisis sa asukal sa nasud.

Karong Lunes, Agosto 22, nagbutang og tarpaulin gawas sa ilang planta ang tigdumala sa Coca-Cola Beverages Philippines, Inc. (CCBPI) Davao Plant 1 nga nagaanunsyo sa temporaryong paghunong sa ilang operasyon.

Ang gikaingong rason sa tigdumala sa planta mao ang kakulang sa bottler’s grade sugar, nga gikinahanglan sa paggama sa carbonated soft drinks.

Nagpagula og hiniusang pamahayag ang CCBPI, uban sa ARC Refreshments Corporation, and Pepsi Cola Products Philippines, Inc., Martes niadtong milabayng semana, Agosto 16, aron pamatud-ang nga nakasinati sila og kakulang sa premium refined sugar, usa ka importanteng sangkap sa ilang mga produkto.

Kasamtangan nang nabatian sa wholesalers, retailers, ug mga konsumante ang mga epekto niini sanglit dunay kakulang na sa suplay sa pipila ka soft drink products tungod sa limitadong produksyon.

Sa usa ka media statement, nagpasalamat ang CCBPI kang Presidente Ferdinand “Bongbong” Marcos, Jr., kinsa kasamtangang nagasilbi isip Agriculture Secretary ug Chair sa Sugar Regulatory Board, sa iyang paspas nga aksyon sa pagtubag sa kakulangan sa suplay sa premium refined sugar sa nasud.

Gihatagan usab og gibug-aton sa kompanya nga ang asukal nga ginagamit nila sa paggama og mga ilimnon dili sama sa sagad ginagamit sa mga panimalay.

Dugang pa nila, kasamtangang dunay kakulang sa premium refined sugar nga mukabat sa 400,000 metriko tonelada, nga gawas pa sa starting gap nga 200,000 metriko tonelada sa local sugar supply alang karong tuiga.

Kini subay sa gibanabanang demand nga 2.3 milyon nga metriko tonelada sa asukal sa tibuok nasud alang sa tuig 2022.

Mamahimong dili igo ang giplanong importasyon sa 150,000 metriko tonelada sa gobyerno aron masulbad ang maong kakulangan.

Atol sa ilang pakigtagbo kang Presidente Marcos, Jr., gibutyag usab nila nga nagkinahanglan ang ilang industriya og kapin kon kulang 450,000 metriko tonelada sa premium refined sugar aron matubag nila ang panginahanglanon sa ilang mga customer nga nagasalig sa liang mga produkto alang sa kita, ug aron makapadagan na sila sa ilang puno nga kapasidad alang sa nahibiling bahin sa kasamtangang tuig.

Mipasalig sa publiko ang kompanya nga sila “kasamtangang nagapatuman na og lainlaing mga pagpaningkamot nga gitumong sa paghupay sa epekto sa kakulang sa suplay sa premium refined sugar ngadto sa mga negosyo.”

“Kami, uban ang mas lapad nga industriya, nagapaabot sa padayong pagtrabaho kauban ang Presidente ug ang tanang dunay kalabutan nga mga buhatan sa gobyerno aron matubag ang kasamtangang kahimtang ug maghatag og malungtarong solusyon sa among pagbalik sa paghatod og sa among tibuok linya sa mga produktong ilimnon ug pagsuporta sa pagpa-ayo sa ekonomiya sa nasud,” dugang sa CCBPI sa pinulungang Ingles.

Samtang, namahayag si Press Secretary Trixie Cruz-Angeles niadtong Dominggo, Agosto 21, nga posibleng “artipisyal” lamang ang kakulangon sa asukal human nadiskubrehan sa mga inspektor gikan sa Bureau of Customs (BOC) ang gipang-hoard nga imported sugar sa nagkadaiyang mga warehouse sa Luzon pa lang.

Gisugdan na sa Kamara de Representantes ang ilang pagsusi sa sugar importation sa nasud niadtong milabayng semana, samtang ang Senate Blue Ribbon Committee nakatakdang magpahigayon og imbestigasyon kalabot niini ugmang adlawa, Agosto 23, matud sa chair niini nga si Senador Francis Tolentino.

Magpahigayon usab og kaugalingong imbestigasyon ang BOC kalabot sa importasyon ug posibleng smuggling sa asukal.

Leave a Reply