Jim Lloyd Dongiapon
––
Gimantala karong adlawa, Hunyo 3, sa Regional Tripartite Wages and Productivity Board (RTWPB) XI sa mantalaang SunStar Davao ang Wage Order No. RB XI-21, nga nagamandong patas-an ang minimum wage sa Davao Region sulod sa duha ug tulo ka hugna, nga epektibo karong Hunyo 18, 2022.
Alang sa unang hugna, ang tanang sektor ang mahatagan og ₱31 nga umento sugod Hunyo 18. Busa, ang bag-ong minimum wage rate alang sa non-agriculture/industrial/commercial ug retail/service nga naga-empleyo og labaw sa 10 ka trabahante mamahimo nang ₱427 gikan sa kasamtangang ₱396; ₱412 alang sa retail/service nga naga-empleyo og di mulapas sa 10 ka trabahante gikan sa ₱381; ug, ₱422 alang sa sektor sa agrikultura gikan sa ₱391.
Sa Enero 1, 2023, ipatuman ang ikaduhang hugna, nga maghatag og laing ₱16 nga umento sa tanang sektor. Ang bag-ong minimum wage rates mamahimong ₱443 alang sa non-agriculture/industrial/commercial ug retail/service nga naga-empleyo og labaw sa 10 ka trabahante; ₱428 alang sa sa retail/service nga naga-empleyo og dili mulapas sa 10 ka trabahante; ug, ₱438 alang sa sektor sa agrikultura.
Ang ulahing hugna, nga ipatuman pa sa Abril 1, 2023, dugang umento nga ₱15 ang ihatag ngadto sa retail/service employing nga naga-empleyo 10 ka trabahante, ug mamahimo nang ₱443 ang ilang minimum wage rate human sa hingpit nga pagpatuman sa wage order.
Kahinumduman nga niadtong Marso karong tuiga, nagduso ang Trade Union Congress of the Philippines (TUCP) og ₱418 wage increase petition ngadto sa RTWPB XI, nga magtakda sa inadlaw nga sweldo ngadto sa ₱814 isip kabahin sa ilang nationwide wage hike campaign taliwala sa pagsaka sa presyo sa lana sa tibuok kalibutan.
Namahayag ang TUCP nga ang kasamtangang wage rates sa nasud ang dili makasagubang sa mga pag-usbaw sa presyo ug dili kini makatabangs aron makalikay sa kagutom.