By: Jim Lloyd Dongiapon
Dul-an sa usa ka bulan human gipatay ang negosyante ug modelo nga si Yvonnette “Yvonne” Chua Plaza, natumbok na sa Special Investigation Task Group (SITG) ang walo sa napulo ka mga suspek, lakip si Brigadier General (BGen.) Jesus Durante III sa 1001st Infantry Brigade (IB) sa Philippine Army nga giila isip mastermind.
Sa press conference nga gipahigayon niadtong Miyerkules, Enero 25, gibutyag ni SITG Spokesperson Police Major (PMaj.) Eudisan Gultiano nga miangko ang mamumusil nga si Private First Class Delfin Sialsa sa iyang extrajudicial affidavit nga si BGen. Durante ang nagplano sa pagpatay kang Yvonne.
“Sialsa, in his extrajudicial affidavit, implicated the mastermind, Brigadier General Jesus Durante, the Brigade Commander of the 1001st IB,” segun ni Gultiano.
(Si Sialsa, sa iyang extrajudicial affidavit, ginganlan ang mastermind, nga si Brigadier General Jesus Durante, ang Brigade Commander sa 1001st IB)
Una nang gihimakak ni Durante ang mga alegasyon nga gibuno kaniya, partikular na sa social media, ug niingon sa usa ka pamahayag nga higala niya si Yvonne, ug nahisubo sab siya uban pamilya ug mga higala sa biktima.
“Yvonne was a friend. My name is being dragged based on an FB post made last April 2022 wherein I allegedly hurt her. She later retracted the post and issued a statement that I did not in any way harmed (sic) her,” Durante said.
(Si Yvonne akong higala. Naguyod akong ngalan tungod sa Facebook post nga gihimo niadtong Abril 2022 diini iyang gipamasangil nga ako siyang gisakitan. Iyang gibakwi kindadugayan ang post ug mipagawas og pamahayag nga wala nako siya gisakitan sa bisan unsa mang pamaagi.)
Unom pa ka miyembro sa 1001st IB, apil ang usa ka sibilyan, ang gipasakaan og kaso kuyog nila Durante ug Sialsa. Kini mao sila Colonel Michael Licyayo, Staff Sergeant Gilbert Plaza, Sergeant Delfin Llarenas, Corporal Adrian Cachero (ang kauban ni Sialsa ug ang tigmaneho sa motorsiklo niadtong higayona nga nahimo ang krimen), Private First Class Rolly Cabal, Private First Class Romart Longakit, ug Noel Hapitan.
Wala pa mailhi ang laing duha ka mga suspek, ug dili pa klaro kung miyembro sab ba sila sa 1001st IB o mga sibilyan.
Midugang si PMaj. Gultiano nga ang SITG nakahimo sa pag-establisar sa relasyon nila ni Yvonne ug Durante.
“We were able to recover the MacBook from the house of the victim, containing intimate photos and email messages to General Durante. Also, the victim posted on her Facebook account that she was maltreated,” matud sa opisyal.
(Nakuha namo ang MacBook gikan sa balay sa biktima, nga adunay sulod nga pribadong mga hulagway ug email messages ngadto kang General Durante. Dugang pa niana, ang biktima nag-post sa iyang Facebook account nga siya gimaltrato)
Dugang pa, gihulagway ni Police Colonel Alberto Lupaz, Director sa Davao City Police Office, ang pagpatay nga usa ka “crime of passion.”
Atol sa samang press conference, gibutyag ni BGen. Allan Hambala, Acting Commander sa 10th Infantry Division, nga ang armas nga gigamit sa krimen usa ka service firearm nga giisyu sa Armed Forces of the Philippines.
Gibutyag sab ni Gultiano nga gipasakaan na og kaso ang mga suspek sa Office of the City Prosecutor sa Davao City.
Durante and Licyaco have both been charged with murder and obstruction of justice. Sialsa and Cachero will face murder and theft charges after it was discovered that the victim’s personal belongings, including her handbag, cellphone, ID, and credit card, were taken and intentionally burned following the incident.
Sila Durante ug Licyaco parehong gipasakaan og kasong murder ug obstruction of justice. Kasong murder ug theft ang atubangon nila Sialsa ug Cachero human nasayran nga ang mga personal nga butang sa biktima lakip na ang iyang handbag, cellphone, ID, ug credit card, gikuha ug gituyo nga gisunog human sa insidente.
Si Cabal gipasakaan pud og kasong murder, ug si Hapitan mag-atubang og kaso isip kakunsabo sa maong pagpatay. Dugang pa niini, ang usa sa wala mailhi nga mga suspek gipasakaan og kasong murder, samtang ang laing usa pa gipasakaan og obstruction of justice.
Mipasalig si Atty. Arcelito Albao, Regional Director sa National Bureau of Investigation XI, nga sa karon luwas sa kamot sa mga otoridad ang mga suspek.
Sa laing bahin, gi-relieve na sa Philippine Army si Durante sa iyang katungdanan alang sa imbestigasyon sa giingong krimen.