By Jim Lloyd Dongiapon
Gikumpirma sa Bureau of Customs (BOC) Port of Zamboanga, pinaagi sa ilang giluwatang press release karong adlawa, Enero 31, nga sila nakasakmit og ₱18.6 milyones sa gipayuhot nga sibuyas sa usa ka barko sa Barangay Ayala, Zamboanga City, niadtong Enero 25.
Kini human sa ulahing operasyon niadtong Enero 23, diin 44,000 ka kilo sa gipayuhot nga pula nga sibuyas ang nahakop sa usa ka pantalan sa Varadero de Cawit, Barangay Cawit, Zamboanga City.
Atol sa maritime operation sa Water Patrol Division sa BOC Port of Zamboanga, nakakumpiska sila og kinatibuk-ang 7,860 ka mesh bag sa pula ug puti nga sibuyas, nga dunay gibanabanaang balor sa merkado nga ₱18.6 milyones, gikan sa barko nga “MV Princess Nurdisza,” nga gikatahong nanukad pa sa Taganak, Tawi-Tawi ug paingon sa Barangay Baliwasan sa Zamboanga City.
Sa ilang pagsusi, napakyas ang mga tripulante sa pagpresenta og Sanitary and Phytosanitary Import Clearance gikan sa Department of Agriculture (DA)-Bureau of Plant Industry alang sa mga gipayuhot nga mga butang.
Ang mga nahisgutan nakalapas sa Section 1401 sa Republic Act (R.A.) 10863, kon ang “Customs Modernization and Tariff Act of 2016,” nga may kalabutan sa R.A. 10845, o “Anti-Agricultural Smuggling Act of 2016.”
Abg mga nasakmit nga sibuyas gidala na sa Research Center sa DA sa Barangay Talisayan, Zamboanga City, alang sa pagtago niini.
Samtang, namahayag si District Collector Segundo Sigmundfreud Z. Barte, Jr. nga ang operasyon niadtong Miyerkules ang ikatulong malampusong pagsikop sa mga iligal nga gi-angkat nga mga sibuyas, human sa mga operasyon niadtong Enero 22 ug 23.
Dugang ni Barte, isip tubag sa mando ni Presidente Ferdinand R. Marcos Jr. sa pagpakunhod sa agricultural smuggling sa nasud, nagapahigayon sila og agresibong kampanya aron magpatumon og hugot nga border control measure pinaagi sa ilang nagapadayong maritime patrol operations sa Kasadpang Mindanao.