Si Atty. Rex Fernandez gi-ambus ug namatay kaganihang hapon, Agosto 25, 2021 didto sa Duterte St., Banawa, Cebu City.
Katapusang nakit-an sa publiko si Fernandez kagahapong adlawa diin iyang gikuyugan ang mga market vendors sa Carbon nga nipasaka og reklamo ngadto sa Regional Trial Court batok sa modernisasyon sa Carbon nga gihimo sa Megawide Construction Corporation.
Si Fernandez usa sa mga abogado sa gitawag nga “Cebu 8″, diin pito niini mga protester ug usa ka bystander nga gidakop sa kapulisan gumikan sa ilang pag rally batok sa Anti-Terrorism Bill didto sa gawas sa kampus sa University of the Philippines Cebu pag Hunyo 5, 2021.
Kahimumduman nga si Fernandez nilusad sa iyang lima ka adlaw nga hunger strike sugod Agosto 13, 2021 batok sa management sa condominium nga iyang gipuy-an human siya giputlan og tubig.
Apan gi-undang niya ang iyang hunger strike pag Agosto 17, 2021 human siya gitambagan sa iyang mga duktor nga delikado na sa iyang panglawas nga posible madaot ang iyang kidney.