By: Jim Lloyd Dongiapon
Pormal nang miduso og counter affidavit Miyerkules sa buntag, Abril 20, si vice presidential candidate Walden Bello ngadto sa Office of the City Prosecutor sa Hall of Justice sa Dakbayan sa Davao batok sa ₱10-million cyber libel case nga gipasang-at ni kanhi Davao City Information Officer Jefry Tupas.
Niadtong milabayng bulan, miduso og kaso si Tupas batok kang Bello tungod sa mga alegasyon niini nga duna kuno siya’y kalambigitan sa drug raid sa Davao de Oro niadtong niaging tuig ug tiggamitan kuno siya og droga.
Mikuyog kang Bello ang iyang mga legal counsel nga sila senatorial aspirant Atty. Luke Espiritu, Atty. Dan Balucos, ug Atty. Kat Leuch.
Sumala ni Bello, nagasuspetsya siya nga dunay nagpaluyo sa pagduso ni Tupas og kasong cyber libel batok kaniya.
Dugang pa niini, gipahayag ni Atty. Espiritu nga wala’y basehan ang maong kaso gumikan kay ang pamahayag ni Bello, gibuhat niya isip argumento batok kang Davao City Mayor ug vice presidential candidate Inday Sara Duterte nga duna siya’y empleyado nga nalambigit sa iligal nga droga.
Sa samang adlaw, misulod sa Sangguniang Panlungsod si Bello ug nagpakuha pa og hulagway sulod sa session hall, ug milingkod pa siya sa lingkuranan ni Vice Mayor Sebastian Duterte, kinsa presiding officer sab sa konseho sa dakbayan.
Matud ni Bello, midayo siya didto aron personal nga mangayo og kopya sa resolusyon nga gipasa sa 19th City Council nga mideklara kaniya isip “persona non grata” tungod sa iyang mga alegasyon nga ang Dakbayan sa Davao ang sentro sa drug trade sa Habagatang Mindanao.
Sa pikas bahin, duna nay reaksyon ang legal counsel ni Tupas nga si Atty. Caesar S. Europa sa gidusong counter affidavit ni Bello.
“Wa pa ko kabasa, but of course it is part and parcel of the right of Mr. Bello to due process for him to be given the opportunity to file his counter affidavit (apan siyempre kabahin kini sa katungod ni Mr. Bello sa angay nga proseso aron siya mahatagan og kahigayunan nga muduso sa iyang counter affidavit),” matud ni Europa.