By: April Therese Tan
Mapasalamaton si Lapu-Lapu City Lone District Representative Paz Radaza sa Uniteam nila Presidential bet Ferdinand “Bongbong” Marcos,Jr. ug Vice Presidential bet Sara Duterte-Carpio, kinsa nanghatag og ayuda karong adlawa, Disyembre 30, 2021 sa siyudad nga grabe ang pagkagusbat human kini nakasinati sa kabangis ni bagyong Odette.
Matud pa ni Radaza nga sila si Marcos ug Duterte-Carpio nanghatag og 2,000 ka sakong bugas, P1 million cash ug napulo ka sako nga mga tsinelas alang sa mga Oponganon nga nabiktima sa bagyo.
Ang kanhi three-term nga mayor sa maong siyudad mapasigarbohon sa duha ka pulitiko nga personal gayud nga nitunol sa maong mga ayuda.
“Dako nakong kalipay nga kining ilang tabang makahatag kini og gamay nga alibyo sa mga Oponganon ning panahon sa unos,” matud pa ni Radaza sa iyang Facebook post.
Si Duterte-Carpio nag-inusara usab nga nibisita ni Lapu-Lapu City Mayor Junard Chan og nidonar og 4,000 ka litros nga diesel alang sa mga heavy equiptment sa siyudad.
Hinatag usab siya og P300,000 cash.
Ang Lapu-Lapu City usa sa mga lugar sa Cebu nga nakahiagom og dakong kadaot tungod sa maong bagyo diin sobra 70 porsiyento sa mga poste sa kuryente ang nangatumba hinungdan nga nakasinati ang mga residente og total blackout, walay tubig ug walay internet connection.
Apan sa pagkakaron adunay nay mga lugar sa siyudad nga hinay-hinay na nga nisiga, naa nay agas sa tubig ug kumikasyon apan mas daghan pa gihapon ang wala pa nakasinati niini.
Gumikan sa bagyong Odette, daghang mga balay ang nangagusbat ug ang mga atop gilupad sa maong siyudad sama sa ubang dapit sa Cebu.-(April Therese Tan)