By Jim Lloyd Dongiapon
––
Gikumpirma ni CHO Head Dr. Ashley Lopez karong adlawa, Hulyo 25, sa pakighinabi sa city-owned radio station nga usa ka 23-anyos nga healthcare worker ug swabber nga nagatrabaho sa Davao City Health Office (CHO) ang pinakaulahing natalang namatay sa nagapadayong diarrhea outbreak sa Toril District.
Matud ni Lopez, ang biktima miinom og tapioca nga pinalit gikan sa usa ka street food stall sa Rasay Street sa Toril niadtong Hulyo 15 ayha kini makasinati og sintomas sa diarrhea.
Gi-admit siya sa Viacrusis Medical Hospital sa Barangay Binugao, ug gi-discharge human ang tulo ka adlaw. Apan, nakasinati kini og relapse ug gidala sa laing pribadong ospital diin ma-confine kini sulod sa unom ka adlaw hangtod makabsan kini sa iyang kinabuhi tungod sa severe dehydration.
Mikutlo na og upat ka kinabuh ang kasamtangang outbreak. Niadtong milabayng semana, natala sa CHO ang kamatayon sa usa ka 67-anyos nga babaye, nga gidala sa Viacrusis Medical Hospital, niadtong Hulyo 19, ug sa 32-anyos nga lalaking magtutudlo, nga gi-admit saIntensive Care Unit (ICU) sa Southern Philippines Medical Center (SPMC), niadtong Hulyo 21, parehong tungod sa severe dehydration.
Samtang, misaka na ngadto sa 261 ang mga kumpirmadong kaso sa diarrhea, diin ang mga aktibong kaso anaa sa 183 karong Hulyo 25. 26 ka mga pasyente pa ang ginapailawom sa beripikasyon.
Sa laing bahin, gibutyag ni Lopez nga gipasirad-an sa ilang buhatan ang duha ka planta sa ice sa Toril tungod sa kalapasan sa sanitation code.
Dugang pa niini, nagpositibo sa bacteria ang mga sample gikan sa mga ginama nilang ice.
Ang maong mga planta, nga wala na ginganlan ni Lopez, nagasuplay og ice cubes nga ginagamit sa mga street food vendor sa Toril alang sa mga ginabaligya nilang ilimnon.