By: Jim Lloyd Dongiapon
Gi-anunsyo sa Qatar Airways nga ibalik na niini ang ilang flights paingon ug gikan Doha, Qatar, ug Davao City, Philippines, ugmang adlawa, Abril 1, tulo ka tuig sukad sa ulahing pagserbisyo niini niadtong 2020.
Gibutyag kini sa maong airline company atol sa ITB (Internationale Tourismus Börse) Berlin 2023 tourism fair sa Germany sayo ning bulana.
Usa lamang ang Davao City sa 11 ka destinasyon diin ibalik na sa Qatar Airways ang mga flight niini. Ang uban pang 10 mao ang Beijing, China; Birmingham, United Kingdom; Buenos Aires, Argentina; Casablanca ug Marrakesh, Morocco; Nice, France; Haneda Airport sa Tokyo ug Osaka, Japan; Phnom Penh, Cambodia; ug Ras Al-Khaimah, United Arab Emirates.
Sugod ugmang adlawa, usa ka Boeing 787-8 Dreamliner passenger plane nga gidestino isip Flight QR-936 ang motugpa matag Sabado.
Mogikan ang Flight QR-936 gikan Doha, Qatar alas 3:05 sa buntag PST (Philippine Standard Time), ug gilaumang moabot sa Mactan-Cebu International Airport alas 5:55 sa hapon PST alang sa 90 minutos nga stopover.
Mobiya ang eroplano sa Cebu alas 7:25 sa gabii PST ug gilaumang moabot sa Francisco Bangoy International Airport sa Davao City alas 8:30 sa gabii PST.
Alang sa ulahing bahin sa flight, mobiya ang eroplano sa Davao alas 10:30 sa gabii PST ug gilaumang makabalik sa Qatar alas 3:55 sa sayong kabuntagon PST kinaugmaan.
Gilusad ang sinemanang Davao-Doha flights niadtong Hunyo 18, 2019, apan gi-operate pa kini kaniadto sa Clark International Airport sa Mabalacat, Pampanga.
Ang desisyon sa airline nga ipadayon ang mga direktang biyahe paingon sa Davao nagpakita sa ilang pagsalig sa ekonomikanhong potensyal sa siyudad, ingon man sa ilang pasalig sa paghatag sa mga pasahero og mas daghang opsyon sa pagbiyahe.