By Jim Lloyd Dongiapon
––
Human sa paglusad sa rutang Manila-Davao sa Parañaque Integrated Terminal Exchange (PITX) kagahapon, Hunyo 15, mamahimo nang operational ang biyahe pabalik sa Manila gikan sa Davao City Overland Transport Terminal (DCOTT) Lunes sunod semana, Hunyo 20.
Ang labing unang biyahe gikan PITX paingon sa Davao City nitikang alas 2:00 kagahapon sa hapon, Hunyo 15. Ang tibuok 1,500-kilometro nga biyahe ang molungtad ug tulo ka adlaw ug duha ka gabii.
Gilaumang muabot kini sa Davao City karong Sabado, June 18.
Sumala sa PITX, ang maong biyahe dunay pipila ka mga hunonganan—Turbina/Sto. Tomas/Laguna, Quirino Meal Place, Naga Terminal, Sorsogon/Matnog, Allen/Samar, Tacloban, Sogod/Southern Leyte, Liloan, Surigao, Kitcharao, Butuan, San Francisco, Monkayo, ug Tagum—ayha kini muabot sa ulahing destinasyon niini nga Davao City.
Ang regular nga presyo sa one way bus ticket nagkantidad ug ₱3,680, apil ang duha ka roll-on roll-off (RoRo) fees sa Matnog ug Surigao Ports.
Nagtanyag ang Davao Metro Shuttle, ang operator sa maong ruta sa bus, og 50 porsyento nga diskwento alang sa mga pasaherong misakay kagahapon alang sa ilang labing unang biyahe.
Sa kasamtangan, mamahimong mag-book og biyahe ang mga pasahero saTicket Booth 3, Counter 8, PITX Second Floor, o di kaha mamahimong tawagan sila pinaagi sa ilang hotline nga 09391351349.