By Jim Lloyd Dongiapon
Gikompirmar karong adlawa sa Armed Forces of the Philippines-Western Mindanao Command (AFP-WESMINCOM) pinaagi sa usa ka press release nga duha ka kanhi sakop sa Abu Sayyaf Group (ASG) ang mitahan na kanila kagahapon sa buntag, Pebrero 6, sa Sulu.
Giila ni Joint Task Force (JTF) Sulu Commander Maj. Gen. Ignatius Patrimonio, Commander sa Joint Task Force Sulu, ang mga mitahan nga sila “Hadjang,” 50 anyos, ug “Nadz,” 20 anyos.
Sumala ni Patrimonio, mitahan ang duha sa ilang kaugalingon ngadto sa 6th Special Forces Battalion, nga ginangulohan ni Lt. Col. Harold Nemeño, sa headquarters niini sa Sitio Maglibak, Barangay Buhanginan, Patikul, Sulu.
Gitugyan sab nila ngadto sa militar ang ilang mga armas: usa ka M16 Elisco rifle ug usa ka kalibre 45 nga pistola.
Human sa pagtahan, daling gitugyan ni Nemeño ang mga kanhi rebeldeng ASG ngadto kang Col. Taharudin Ampatuan, Acting Brigade Commander, sa 1103rd Infantry Brigade headquarters sa Camp Bud Datu, Barangay Tagbak, Indanan, Sulu.
Nihatag sab ang 1103rd Brigade og inisyal nga hinabang pinansyal ug pagkaon sa mga kanhi rebelde.
Nagpadayag og pasalamat si Lt. Gen. Roy Galido, Commander sa AFP-WESMINCOM, ngadto sa JTF Sulu, sa probinsyal nga panggamhanan sa Sulu, sa ilang mga kauban ug mga hingtungdan, ingon man sa katawhan sa Sulu, tungod sa ilang kontribusyon sa whole-of-nation nga estratehiya, nga miresulta sa malampusong pagtahan sa mga kanhi rebelde sa probinsiya.
Misaad usab si Galido nga ang maong mga paningkamot magpadayon alang sa pagdala og malungtarong kalinaw ug pag-uswag dili lamang sa Sulu, kon dili lakip na sa ubang mga dapit nga ilang gisakupan.