By Frances Pio
––
Hindi lang ang mga kasalukuyang manlalaro ng Gilas Pilipinas ang nadismaya sa pagbatikos ng home crowd kay Head Coach Chot Reyes sa Fiba World Cup 2023 Asian Qualifiers noong Lunes sa harap ng 19,829 fans sa Mall of Asia Arena.
Maging ang dating national team star na si Marc Pingris, na nanood ng laro kasama ang kanyang anak, ang celebrity father-in-law na si Vic Sotto, at ang Pasig Mayor at ang bayaw na si Vico Sotto, ay iisa ang damdamin.
“Nung nakita ko kanina medyo nasasaktan ako. Sorry sa mga fans kasi kailangan niyong malaman ito. Ang hirap maging isang coach lalo na kung hindi niya makuha yung time or yung practice or yung mga gusto niyang kunin na players,” sinabi ni Pingris.
Naniniwala ang PBA legend, na nagretiro noong 2020, na maging ang dating Gilas coach na si Tab Baldwin ay hinarap din ang mga isyu gaya ni Reyes dahil sa kawalan ng oras ng paghahanda at kawalan ng available na mga manlalaro.
“Kahit sinong ilalagay nyo na coach dito, sasabihin ko na sa inyo kahit si coach Tab ang ilagay niyo dito, one week practice lang, hindi nila kaya magchampion or manalo. Kasi ang buhay diyan coach tas players diba kailangan magjell sila yung practice yung defense nila importante. Kailangan alam nila yun,” sinabi ni Pingris.
Gayunpaman, tuwang-tuwa si Pingris nang makita ang pinakabagong Gilas squad, sa pangunguna nina Jordan Clarkson at Kai Sotto, na nag-steamroll sa Saudi Arabia, 84-46, para tapusin ang fourth window na may 3-3 record at nakabangon mula sa matinding pagkatalo sa Lebanon noong Biyernes sa Beirut.