By Jim Lloyd Dongiapon
––
Gi-anunsyo sa Commission on Elections (COMELEC) nga andam na ang tanan alang sa ipahigayong Maguindanao division plebiscite ugma Setyembre 17.
Sa usa ka press briefing niadtong Huwebes, Setyembre 16, miingon si COMELEC Commissioner Aimee Ferolino nga nahatod na ang mga gikinahanglang suplay ug paraphernalia ug ang tanang mga personahe nga magsilbi sa plebisito ugma napailalom ug nakakompleto na sa ilang pagbansay-bansay.
Sumala ni COMELEC Deputy Executive Director for Operations Teopisto Elnas Jr., 5,718 ka mga magtutudlo gikan sa pangpublikong mga tunghaan ang magsilbi isip Board of Election Inspectors (BEIs) sa 1,669 ka clustered precinct sulod sa 467 voting centers.
Dugang niya, magpakatap og duha ka personahe matag voting center ang Philippine National Police samtang 2,961 ka mga personahe gikan sa Armed Forces of the Philippines ang mohatag og paggiya.
Sa laing bahin, sa usa ka pakighinabi sa ABS-CBN News Channel Biyernes, Setyembre 16, misulti si COMELEC acting Spokesperson Atty. John Rex Laudiangco nga nagalaum sila og taas nga turnout gikan sa 939,011 ka mga rehistradong botante sa Maguindanao.
“We are expecting, hopefully, we will achieve 60 percent of [voting turnout]. Traditionally, the plebiscite voting is around that figure (Nagalaum kami, ug hinaut unta nga makab-ot namo ang 60 porsyento nga voting turnout. Sa naandan na, ang pagbotar sa plebisito anaa sa maong numero),” matud niya.
Ang pagbotar sa plebisito, nga mano-manong ipahigayon, magsugod alas 7:00 sa buntag ug matapos alas 3:00 sa hapon. Apan, kon duna pa’y mga botante nga naglinya sulod sa 30-metros nga radius sa polling precinct, sila maakomodar pa gihapon.
Magdesisyon ang mga Maguindanaon kon ilang ratipikahan o isalikway ang Republic Act No. 11550, ang balaod nga nagtunga sa Maguindanao ngadto sa duha ka bag-ong lalawigan, nga mao ang Maguindanao del Norte ug Maguindanao del Sur.
Kung makab-ot sa “yes” votes ang mayorya, mao kini ang mga molangkub sa mga bag-ong probinsya:
Maguindanao del Norte
Datu Odin Sinsuat (kabisera)
Barira
Buldon
Datu Blah T. Sinsuat
Kabuntalan
Matanog
Northern Kabuntalan
Parang
Sultan Kudarat
Sultan Mastura
Sultan Sumagka (Talitay)
Upi
Maguindanao del Sur
Buluan (kabisera)
Ampatuan
Datu Abdullah Sangki
Datu Anggal Midtimbang
Datu Hoffer Ampatuan
Datu Montawal
Datu Paglas
Datu Piang
Datu Salibo
Datu Saudi Ampatuan
Datu Unsay
Gen. Salipada K. Pendatun
Guindulungan
Mamasapano
Mangudadatu
Pagalungan
Paglat
Pandag
Rajah Buayan
Shariff Aguak
Shariff Saydona Mustapha
Sultan sa Barongis
South Upi
Talayan
Ang Cotabato City, nga usa ka independent component city sa Maguindanao, mamahimong kabahin sa legislative district sa Maguindanao del Norte.
Sa Buluan pagahimuon ang pag-canvass sa mga boto, ug ang mga resulta mamahimong mahibal-an na sugod sa tungang-gabii sa Dominggo, Setyembre 18.