Nitaliwan karong adlawa ang kanhi gobernador sa Cebu Province nga si Pablo “Pabling” Garcia sa edad nga 95.
Kini matud pa sa iyang anak nga si Cebu Third District Representative Pablo John “PJ” Garcia sa iyang Facebook page.
Si Pabling kinsa nahimong gobernador sulod sa tulo ka termino, amahan ni Cebu Governor Gwendolyn Garcia.
Si Pabling usa ka topnotcher (third placer) sa 1951 Bar Examinations. Usa siya ka inila nga trial lawyer, law propesor ug respetadong Constitutionalist.
Usa ka mahigugmaong bana ug amahan, si Pabling nagkuyog na karon sa sabakan sa Ginoo uban sa iyang kanhing asawa nga si Judge Esperanza Fiel Garcia ug ingon man ang iyang kanhinganak nga sila si Nelson ug Marlon.
Ang kanhi Deputy Speaker sa 14th ug 15th nga Kongreso, adunay nahabilin nga mga anak gawas nila PJ ug Gwendolyn nga sila Deirdra, Winston, Byron ug Farla ingon man ang 27 ka apo ug 18 nga apo sa tuhod.
Matud pa ni PJ nga tungod sa quarantine restrictions, ang haya ug lubong sa iyang amahan limitado lang kini sa miyembro sa pamilya.
Dugang pa ni PJ nga ianunsiyo lang unya nila ang necrological services kung moluag na ang quarantine restrictions.