Share:

By Jim Lloyd Dongiapon

Gi-absuwelto sa Regional Trial Court Branch 14 sa Davao City si kanhi Police Lieutenant Colonel (PLT. Col.) Leonardo Felonia sa iyang alegasyong kalambigitan sa pagpatay sa negosyanteng Cebuano nga si Richard King niadtong tuig 2014.

Gihimo ni Atty. Caesar Europa, abogado ni PLT. Col. Felonia, ang maong anunsyo kagahapon sa hapon, Pebrero 7. 

Gibutyag sab ni Atty. Europa pinaagi sa usa ka virtual press conference nga gibuhian na ang iyang kliyente alas 4:30 sa hapon kagahapon human sa walo ka tuig niini nga pagkapriso.

Niadtong Hunyo 12, 2014, hapit siyam ka tuig na ang nakalabay, gipusil-patay si Richard Lim King, 57, sa usa ka mamumuno samtang siya ug ang iyang mga empleyado nangaon sulod sa Vital-C Building sa Sobrecarey Street, Barrio Obrero, Davao City.

Si King nagsilbi isip chairman ug chief executive officer sa J. King & Sons Co. Inc.. Siya usab ang developer sa Crown Regency, Club Ultima, ug City Suites Ramos Tower, ug ang founder ug director sa Boracay Multiple Properties Inc.

Niadtong Hunyo 23, 2014, 11 ka adlaw human sa pagpatay, si Paul Dave Labang, nga miangkon sa kaugalingon isip mamumusil, mitahan sa mga awtoridad ug ginganlan si Felonia, kinsa nagsilbi nga hepe sa Regional Intelligence Unit-11 niadtong panahona, isip ang alegasyong mastermind. 

Kinaugmaan, niadtong Hunyo 24, 2014, gitugyan ni Felonia iyang kaugalingon ngadto sa mga awtoridad. Gitangtang sab siya gikan sa iyang katungdanan sa wala madugay.

Gisuspenso sab siya sa Deputy Ombudsman for the Military and Other Law Enforcement Offices niadtong tuig 2015 tungod sa iyang giingong pagkalambigit sa krimen. 

Human sa malawmong pagsusi sa krimen, ang Special Investigation Task Group (SITG) “King” mihinapos nga ang mga motibo “negosyo ug pagdumot.”

Gawas kang Felonia ug Labang nga parehong gipasakaan og kasong murder, nasikop ug gipangkasuhan usab sila Rodel ug Rommel dela Cerna.

Samtang. ang pamilya ug mga paryente ni King wala pa magpagawas sa ilang pahayag kalabot sa labing ulahing kalamboan sa kaso.

Leave a Reply