By Jim Lloyd Dongiapon
Usa ka kusog nga linog ang mitay-og sa pipila ka bahin sa Mindanao pasado alas 4:05 sa hapon karong Miyerkules, Oktubre 19.
Nagpagula og bulletin ang Philippine Institute of Volcanology and Seismology (PHIVOLCS) alas 4:15 sa hapon, ug natala niini nga anaa sa magnitude 5.5 ang gikusgon sa linog.
Nahimutang ang episentro sa linog sa unom ka kilometro Habagatan, 29 ka degree Kasadpan sa Matanao, Davao del Sur. Ang gilawmon sa pokus sa linog anaa sa usa ka kilometro ug tectonic ang tinubdan niini.
Ang mga dakbayan sa Davao ug General Santos gikataho na ang linog anaa sa intensity IV, kon “Moderately Strong.”
Sa instrumental intensities, ang Kidapawan City sa North Cotabato, Koronadal City, ug ang lungsod sa Norala sa South Cotabato tanan mitala og Intensity V, kon “strong earthquake.”
Natala angIntensity IV (Moderately Strong) sa Jose Abad Santos sa Davao Occidental; Alabel sa Sarangani; Tampakan, Tantangan, Tupi, ug General Santos City sa South Cotabato; ug Columbio sa Sultan Kudarat.
Intensity III (Weak) ang nabatian sa Libona, Bukidnon; Don Marcelino, Davao Occidental; Maasim, Kiamba, ug Malapatan sa Sarangani; ug Santo Niño, Polomolok, Suralla, ug T’Boli sa South Cotabato.
Intensity II (Slightly Felt) ang narehistro sa Alamada, North Cotabato; Nabunturan, Davao de Oro; Maitum, Sarangani; ug Lake Sebu, South Cotabato.
Ug, Intensity I (Scarcely Perceptible) ang naobserbahan sa Malaybalay, Bukidnon, ug Cagayan de Oro City sa Misamis Oriental.
Gikataho usab sa PHIVOLCS nga gilauman ang kadaut sa struktura ug mga aftershock human sa pagtay-og.
Gipahinumduman usab ang publiko nga mag-public “Drop, Cover, and Hold,” mobalhin sa hawan nga lugar kon anaa sa gawas, likayan ang mga titip nga bakilid, mobalhin sa mas taas nga lugar kon duol sa baybayon, ihunong ang sakyanan, ug paglikay sa pagtabok sa mga tulay, overpass, o flyover atol sa linog.
Gi-abisuhan usab sila nga mobakwit dayon human sa paghunong sa linog, lauman na ang posibleng mga aftershock, i-monitor ang sitwasyon sa bisan unsa mang plataporma nga anaa, palungon ang gagmayng kalayo gamit ang mga extinguisher, ug susihon ang ilang mga kaugalingon ug sa uban alang sa mga samad o bali sa kalawasan.