By Jim Lloyd Dongiapon
––
Gideklara sa Malacañang nga usa ka regular holiday sa tibuok nasud ang Sabado, Hulyo 9, isip pagsaulog sa Eid’l Adha o Feast of Sacrifice, usa sa duha ka importanteng holiday sa relihiyong Islam.
Gilagdaan ni Executive Secretary Victor Rodriguez, pinaagi sa awtoridad nga gitugyan kania ni Presidente Ferdinand “Bongbong” Marcos, Jr., ang Proclamation Number 2 niadtong Martes, Hulyo 5.
Ang proklamasyon nahisubay sa rekomendasyon sa National Commission on Muslim Filipinos (NCMF) nga ideklara ang moabutay nga Sabado, nga ikanapulong adlaw sa Zhul Hijja o ikadose ug ulahing bulan sa 1443 Hijrah Islamic Lunar Calendar, isip regular holiday subay sa Republic Act (RA) No. 9849.
Dugang sa proklamasyon, ang kasaulugan kinahanglang mapailawom sa mga pangpublikong sumbanan sa panglawas sa nasudnong panggamhanan.
Niadtong milabayng bulan, gideklara sa Bangsamoro Darul-Ifta ‘ ang Hulyo 9 isip pagsugod sa pista subay na sab sa pagkakita sa arkong bulan sa Saudi Arabia.
Ang Eid’l Adha ang nagatapos sa Hajj o ang panawduaw paingon sa Mecca. Ginahandom usab niini ang kaandam ni Ibrahim nga mutuman sa mando ni Allah SWT (Subhanahu wa ta’ala) nga ihalad ang iyang anak nga si Ismail.
Ang pagpagula og mga proklamasyon alang sa Eid’l Adha ug Eid’l Fitr subay RA 9849 ang nakabase sa mga gibanabanang adlaw nga matunong kining mga pista sa Islamic Lunar Calendar o sa Islamikong kalkulasyong astronomiko.