By Jim Lloyd Dongiapon
Karong adlawa, Oktubre 17, nagtimaan sa ikalima nga anibersaryo sa kagawasan sa Dakbayan sa Marawi human ang lima ka bulan nga panagsangka tali sa mga pwersa sa gobyerno ug sa mga terorista nga kaanib sa Islamic State of Iraq and Syria (ISIS), lakip ang mga grupo sa Maute ug Abu Sayyaf, nga nagsugod niadtong Mayo 23, 2017.
Gi-organisa sa Philippine Army ang seremonya agig pag-obserbar sa okasyon didto sa Libingan ng mga Bayani sa Dakbayan sa Taguig ug gipangulohan kini ni Presidential Adviser for the Peace Process, Reconciliation, and Unity Secretary Carlito Galvez Jr.
Nagsugod ang seremonya sa usa ka wreath-laying sa Marawi Pylon, usa ka memorial nga gitukod niadtong 2018 aron pasidunggan ang mga pwersa sa gobyerno nga nakigbatok sa mga terorista atol sa Marawi siege.
Gipamahayag ni Galvez nga ang seremonya usa ka pamaagi sa paghandum sa 169 ka mga pwersa sa gobyerno nga nakabsan sa ilang kinabuhi ug sa 1,800 ka mga tropa sa kagamhanan nga naangol atol sa panagsangka.
Miingon usab siya nga dunay mga nagapadayong proyekto alang sa mga kalsada, tulay, ug uban pang mga imprastruktura sa Marawi isip kabahin sa rehabilitasyon niini.
Dugang niya, duna pud mga programa ang Office of the Presidential Adviser for Peace, Reconciliation, and Unity (OPAPRU) aron tabangan ang mga nabiling mga pamilya sa mga namatay nga tropa sa gobyerno ug sa mga apektadong lungsuranon.
Anaa usab sa maong kalihokan sila kanhi Department Interior and Local Government (DILG) Secretary Eduardo Año, kinsa Chief of Staff sa Armed Forces of the Philippines (AFP) kaniadto atol sa giyera, ug si kanhi Department of Social Welfare and Development (DSWD) Secretary Rolando Bautista, kinsa nagsilbing commander sa Joint Task Force Marawi.
Laing wreath-laying ceremony ang gipahigayon sa Camp Ranao sa Dakbayan sa Marawi, aron paghinumdum sa kaluwasan sa dakbayang gidaot sa giyera gikan sa mga kalaban sa estado.
Niadtong Oktubre 17, 2017, human sa lima ka bulan nga gubat, mibisita si kanhi Presidente Rodrigo Duterte sa Marawi ug gideklara ang dakbayan nga luwas gikan sa “impluwensya sa terorista,” nga nagtimaan usab sa pagsugod sa nagapadayong rehabilitasyon niini.
Pipila ka adlaw ang milabay, opisyal nang gideklara nga natapos na ang gubat niadtong Oktubre 23, 2017, human makumpirma nga patay na sila Abu Sayyaf leader ug ISIS emir sa Southeast Asia Isnilon Hapilon, ug Maute group co-founder Omarkhayam Maute.