Jim Lloyd Dongiapon
–
Gibutyag ni Mati City Mayor Michelle Nakpil-Rabat nga dunay ₱500,000 nga ganti ang nagahulat sa kung kinsa man ang makahatag og mahinungdanong impormasyon kalabot sa suspek nga mipaluyo sa pagpatay kang Barangay Matiao Captain Ronnie Valera, kinsa gipusil-patay sa iyang panimalay sa Purok Matahimik-1 sa iyang barangay Miyerkules Santo sa gabii, Abril 14.
Matud ni Rabat, midesisyon siya nga maghatag og ganti aron maawhag ang mga tawo nga itug-an sa mga awtoridad ang bisan unsa mang impormasyon nga yawi sa pagtino sa sad-an.
Una na niyang gikondena ang pagpatay kang Kap Ronnie, nga naila isip usa sa iyang lig-on nga tigsuporta, ug mipasalig nga mahatag ang hustisya. Gikonsidera usab niya ang insidente isip unang maduguong insidente sa dakbayan atol sa 2022 election season.
Kasamtangang ginaimbestigahan sa Mati City PNP ang maong insidente. Wala pa nila gisalikway ang mga posibleng anggulo niini sama sa posibilidad nga ang nasangpit nga krimen nadasig sa politika.
Nagapahulay si Kap Ronnie sa iyang duyan sa dihang kalit na lang nga misulod sa iyang propedad ang mamumusil og gipusil siya sa ulo gikan sa luyo. Gidala gilayon siya sa Davao Oriental Provincial Medical Center, apan gideklara na siyang dead on arrival.
Nakuha gikan sa gipanghitabuan sa krimen ang tulo ka basyo sa kalibre 45 nga pusil. Nakuha usab ang pusil nga gipanag-iyahan sa kapitan duol sa iyang duyan.