By Jim Lloyd Dongiapon
Gipamalita sa Department of Tourism (DOT) Region X nga kadaghanan na sa mga nag-unang hotel ug resort sa rehiyon ang fully booked na alang sa Semana Santa.
Sumala ni DOT X Director Marie Elaine Unchuan, ang isla nga probisya sa Camiguin ang adunay pinakadaghang reservations alang sa unang semana sa Abril gumikan kay kini ang mag-host sa tinuig nga “Panaad,” diin ang mga Katoliko mobisita sa mga simbahan ug moampo sa Dalan sa Krus o Via Crucis.
Dugang pa ni Unchuan, gilauman na ang pagdagsang sa mga bisita sa Camiguin sanglit midungan sab kini sa paglusad sa tourism slogan sa lalawigan nga “Isle Be There,” ingon man ang pagpalu-ag sa mga reglamento sa COVID-19
Gibutyag sab niya nga dili ipahigayon karong tuiga ang pagpasundayag sa tinuig nga “Hinuklog” Lenten presentation sa lungsod sa Medina, Misamis Oriental, tungod sa mga pagpahugot nga gipatuman sa lokal nga panggamhanan.
Ang Hinuklog usa ka pagpasundayag sa kadalanan diin ang mga lumulupyo sa Medina nagasul-ob og mga costume ug ginasunlog ang mga ulahing adlaw ni Hesukristo bag-o ang paglansang Kaniya sa krus ug ang Iyang pagkabanhaw.
Sa uban pang mga balita, magpahigayon ang DOT X, sa pakigtambayayong sa Department of Labor and Employment, og usa ka job fair sugod ugmang adlawa, Marso 30,hangtod Biyernes, Marso 31, diin kapin 2,000 ka mga trabaho sa sektor sa turismo ang ihanyag ngadto sa mga interesadong aplikante.