By: Jim Lloyd Dongiapon
Nagpagula og update ang Department of Science and Technology-Philippine Institute of Volcanology and Seismology (DOST-PHIVOLCS) nga nagklaro ngag ang mga sagunsong pagtay-og sa yuta sa Davao de Oro dili gumikan sa Leonard Kniaseff Volcano, nga naila sab isip Mount Leonard sa mga lokal.
Gibuhat kini agig pagtubag sa mga hungihong sa social media nga ang Mt. Leonard mao’y posibleng hinungdan sa magnitude 5.9 ug magnitude 5.6 tremors nga mga paglinog nga miigo sa lungsod sa New Bataan niadtong Martes, Marso 7.
Namahayag ang PHIVOLCS nga ang mga linog tectonic ang tinubdan ug wala magtimaan sa kalihokan sa bulkan, bisan pa man nga ang Mt. Leonard kapin kon kulang 13 kilometros ang gilay-on gikan sa episentro.
Hinuon, ang ahensya panid-an pag-ayo ang bisan unsa mang panghitabo nga posibleng timaan sa aktibidad sa bulkan nga Mt. Leonard.
“As part of the DOST-PHIVOLCS monitoring procedures for moderate to large earthquakes occurring near active volcanoes, the Institute will closely monitor earthquake events in relation to any activity that may be closely associated with Leonard Kniaseff Volcano (Isip kabahin sa DOST-PHIVOLCS monitoring procedures alang sa kasarangan ngadto na sa kusog nga paglinog duol sa mga aktibong bulkan, and Institute panid-an pag-ayo ang mga pagtay-og kalabot sa bisan unsa mang aktibidad nga posibleng makonekta ngadto sa Leonard Kniaseff Volcano),” ingon niini.
Ang Mt. Leonard usa ka aktibong stratovolcano sa Davao de Oro, nga nahimutang tali sa mga lungsod sa Mabini ug Maco. Duna kini caldera lake nga dunay gilapdong 2.03 kilometros nga naila isip Lake Leonard.
Duna nay geothermal explorations nga gipahigayon sa Leonard Range, diin lakip ang Mt. Leonard. Duol sa bulkan, dunay makit-ang thermal areas sama sa Amacan-Gopod ug Manat, hot springs, solfataras (mabaw nga craters sa bulkan nga nagabuga og alisngaw sa sulfur fumes), ug fumaroles (mga buho nga nagabuga og init nga mga volcanic gas nga wala’y kaubang solido o likido).
Sumala sa Global Volcanism Program sa Smithsonian Institution, ulahing mibuto ang Leonard Kniaseff Volcano niadto pang 120 AD.