By Jim Lloyd Dongiapon

Gihangyo ni Bangsamoro Autonomous Region in Muslim Mindanao (BARMM) Chief Minister ug Moro Islamic Liberation Front (MILF) Chairman Ahod Balawag “Murad” Ebrahim ang mga politiko sa ilang rehiyon nga idstrungka na ang ilang mga pribadong kasundalohan

Gibuhat kini human sa “urgent appeal” ngadto kang Presidente Ferdinand “Bongbong” Marcos, Jr., nga gihimo sa upat ka BARMM provincial governors: sila Maguindanao del Sur Governor Bai Mariam Sangki-Mangudadatu, Sulu Governor Abdusakur Tan, Tawi-Tawi Governor Yshmael Sali, ugBasilan Governor Hadjiman-Salliman Hataman.

Miapela ang mga gobernador nga papaspasan na ang proseso sa decommissioning sa MILF, ug miangkon nga ang mga pagkalangan niini nakatampo sa “culture of lawlessness” sa ilang rehiyon.

Namahayag si Ebrahim nga wala siya’y problema sa pagpapaspas sa decommissioning, apan gipahimug-at niya nga kinahanglan dungan kini sa pagpuhag sa mga pribadong kasundalohan sa ilang rehiyon.

Mipadaag sab si Mohagher Iqbal, ang labaw sa MILF Peace Implementing Panel, sa iyang kabalaka kalabot sa presensya sa mga pribadong armadong grupo sa ilang lugar.

Gipunto ni Iqbal nga dili makiangayon alang sa ilang grupo nga motahod sa proseso nga gimando sa  Comprehensive Agreement on the Bangsamoro (CAB) samtang ang mga pribadong kasundalohan ug mga politiko nagapadayon gihapon sa pagpanag-iya og mga armas, bisan pa man nga ang pagdistrungka ug ang pagtunol sa mga armas kabahin sa nasangpit nga kasabotan. 

Militok sab siya sa iyang pagduda sa tinood nga katuyoan sa duha ka gobernador nga mihimo sa maong apela.

“Ako, naniniwala ako na maganda ang hangarin nina Governor Sali at Governor Hataman (Nagatuo ako nga maayo ang katuyoan nila Governor Sali ug Governor Hataman),” segun niya sa usa ka local radio interview.

Giklaro sab niya nga dili ang MILF ang mibanhig kang Lanao del Sur Governor Mamintal Adiong, Jr, dungan sa pagtubag sa komentong “culture of lawlessness” nga gibuhat sa mga gobernador. 

“Those who ambushed Gov. Adiong were drug groups and the ISIS groups. We have no quarrel with him, and we cannot do that to him either. They cannot conclude that we are part of it, that is a fallacious argument (Kadtong mga mibanhig kang Gov. Adiong mga drug group ug mga ISIS group. Wala mi panagbangi kaniya, ug dili namo na mabuhat kaniya. Dili sila makahukom nga kabahin mi niana, ug usa kana ka madaotong argumento,” matud ni Iqbal.

Gipahimug-at ni Iqbal nga ang decommissioning mag-agad sa tukmang proseso ug magdepende sa pagtuman sa mga gihimong pasalig gikan MILF ug sa gobyerno sa Pilipinas.

Gimando sa CAB ang pag-decommission sa kapin 40,000 ka mga kombante sa MILF, diin 19,345 ka mga kombante ug 2,175 ka mga armas ang na-decommission na niadtong 2015, ug laing 12,000 ka mga kombante ug 2,100 ka mga armas niadtong 2019.

Gi-anunsyo niadtong Setyembre 27, 2022 sa Office of the Presidential Adviser on Peace, Reconciliation, and Unity (OPAPRU nga dunay kinatibuk-ang 14,000 ka kombante ang gitinguha nga i-decommission sa ikatulong hugna sa maong proseso.

Leave a Reply